Aicynoj dasaceit pretendentus Latgolys Goda bolvai
![Aicynoj dasaceit pretendentus Latgolys Goda bolvai](https://www.lakuga.lv/wp-content/uploads/2014/09/asmu-latgalits-1000x667-c-default.jpg)
27. septembrī Preiļūs nūtiks Latgolys Goda bolvys svineiguo ceremoneja, kuru reikoj bīdreiba “Asmu Latgalīts”. Leidz 21. septembram sevkurs var dasaceit pretendentus kaidā nu septeņu nominaceju: Latgolys goda lobuokais lauksaimnīks – sovys zemis saiminīks, Latgolys goda aktivuokais jaunīts, Latgolys goda saime, Latgolys goda varūņs, Latgolys goda uzjiemiejs – par īguļdejumu Latgolys tautsaimnīceibys izaugsmē, Latgolys goda aktivuokais seniors i Latgolys goda sirds cylvāks (cylvāks, kurs ar sovu dorbu, tālu ci pīmāru īdvasmoj cytus).
Latgolys Goda bolva ir bolvu padūšonys ceremoneja, kab gūdynuotu Latgolys cylvākus, organizacejis, uzjāmumus par eipašim nūpalnim i īguļdejumu cylvāka ilgtspiejeigā atteisteibā, kurā teik nomināti tī Latgolys nūtykumi, pasuokumi ci cylvāku puorstuovi, kuri goda laikā ir davuši vysleluokū īguļdejumu Latgolys lobā, ar konkretu dorbu, vārā jemamim rezultatim, akcejom i cytim pasuokumim, kas ir nūzeimeigi Latgolys regionam i Latgolys atpazeistameibai sabīdreibā.
Bolvys mierkis ir veicynuot ilgtspiejeigu atteisteibu, sekmēt ekonomiskū izaugsmi i vairuot Latgolys dzeivuotuoju lobkluojeibu, akcentēt pozitivū, vīnuot Latgolys dzeivuotuojus, kai ari veicynuot tūs aktivitatis iz prīšku.
Iz bolvu var pretendēt Latgolys regiona dzeivuotuoji, Latgolā registrāti uzjāmumi i organizacejis. Dasacejumu bolvu konkursam īsnādz elektroniski, syutūt iz asmulatgalits@gmail.com, voi pa postu, syutūt iz bīdreibys “Asmu Latgalīts” adresi Poligona īlā 28-1, Daugovpilī, LV-5413, ar nūruodi “Pretendenta dasacejums konkursam “Latgolys Goda bolva””.. Dasacejumā juoīkļaun informaceja par bolvys pretendentu, iniciativys aproksts, panuokumi i rezultats, kai ari vysmoz vīna atsauksme.