Leivuonā, Latgolys muokslys i omotnīceibys centra izstuožu zalā, leidz 9. decembram apsaverama viesturiska izstuode nu Leivuona stykla muzeja kruojuma “Malnboltais”.

Izstuodis ideja ir attāluot stykla trauku garū ceļu nu idejis leidz masveida ražuošonai, kū piečuok ītvēre ari fabrikys produkcejis katalogūs.

Izstuodē apsaverami Leivuona stykla muzeja kruojumā asūšuo “Malnboltuo” kataloga trauki. Itaida veida katalogi tyka izstruoduoti, kab veiduotu puorskotamu fabrikā saražuotuos produkcejis pīduovuojumu.

“Malnboltais” katalogs tyka izdūts 20. godu symta 80. godu beiguos i 90. godu suokumā. Katalogā apkūpuoti Leivuona stykla fabrikys sortimentā asūšī škirnis trauki aba golda trauki – gluožu komplekti, vāzis, korstveina trauki, kompetu trauki nu stykla i kristala.