Kod esi suocs dūmuot, ka raksteit dzeju vaira nasagryb

Kod esi suocs dūmuot, ka raksteit dzeju vaira nasagryb

Vakarnakt īkrytu gultā piec treju. Bejom Upītē – tai i stuostu draugim, a jī, koč i latgalīši, nu nasaprūt. Nu kas tī par romantiku?! I es suoču skaidruot, kas tys taids Ontons Slišāns i kas “Upītes Uobeļduorzs”, i ka tys vacuokais meilys aiļu festivals i ka vyspuor tī skaņ dzeja i muzyka. I ka Upīte atsarūn 4 km nu Krīvejis rūbeža. Koč kai tai maņ saguoja eisumā.
Tī, kas bejuši Upītē – tī zyna, cik tī jauki i forši. Ka var satikt vysus pazeistamūs latgalīšus i īsapazeit ar tikpat daudzim jaunim. Bet ni par tū itūreiz stuosts.

Cikom es siedieju, škurynuoju sovys izprintietuos lopys i dūmuoju, kū lai eisti runoj, muns blokussādātuojs maņ apsavaicuoja, voi ta es te laseišu ailis. Papruoveju sovus brunčus, i soku, ka da. A jis dzīžūt. Super. Rodūša jaunatne. Cikom kotrs nu ailinīku skaita, kū nu prūt i gryb, namaļdeigi nanūeimūt nu kursa – vīnam meila pret pretejū dzymumu, cytam – pret vysu cylvāku dzymumu, es sovā pruotā puorlīku, ka pādejuo goda laikā asmu pīrakstejuse vīnu dzejūli latgaliski, kas maņ pateik, i treispadsmit latvīšu literarajā. Maņ ir treis stuosti – pa daļai tulkuoti, nu tai kai kauns publicēt. Mozums, ka kaida taņte var giut pi sirds, skaitūt munys variacejis ap temu “meila i prīstereiba”. Nu varbyut, ka maņ ir komplekss dzeivuot īkš sovaidim vuordu mistruojumim, taidim kai, pīmāram, “heštegs”,“sinhronizaceja” i puorejais salauz-sovu-pruotu-pats, kurus dīzyn voi saprūt pats dzejūļu autors. Varbyut, ka itū periodu es izdzeivuoju tod, kod maņ beja 17 i raksteju dzeju pa labi i pa kreisi, eisti naprozdama likt uzsvorus i paust sovys idejis. A varbyut tys ir tys, iz kū īt myusu postpostpostpostmodernuo dzeja? Literaturzynuotnis bolss ir grīzeigs: “Bārni, es izkiduošu jiusu rindenis, izgrīsšu burtus kai kirurgs apendicitu, uzškiersšu jiusu simbolus, homonimus i idiomys.” Beigu beiguos puori paliks nikas. I vēļ sovaidys akcejis i flešmobi ar Windows ERROR signalim. Ēmmm, O.K., Ligija Purinaša dzeivoj papeira laikmetā. I juos pasaulī cylvāks,  kas roksta, vys vēļ ir reala persona, kas eksistej na e-vidē, nu face to face. Bet maņ pateišom beja lela prīca klauseitīs Raibū, deļtuo ka, ka maņ byutu juojam kaids juo dzejūļs analizei, tod es varātu byut 98% puorlīcynuota, ka tī byus daudz sluoņu, i daudz vysaidu cytu filologisku prīceņu. Paceļu datorpeli gaisā iz juo īdvasmom!

Vakarnakt Upītē sajiemu SMS nu Tele2 ar sveicīnim, ka es asūt izavieliejuse braukt iz Krīveju, i ka 1MB datu puorraidis maņ moksuos 5.67 EUR. Nui, draugi, cena par byušonu latgalīšam pīrūbežā ir augsta. Tu vari byut najauši pīskaiteits pi cytys vaļsts i cytys kulturys. I vari nuokt pi secynuojuma, ka eisti nazyni, voi byut latgalīšam ir glamureigi (taids vaicuojums maņ palyka aktuals, vārojūt dažus publikys īpatņus). Nu varbyut kotram sovs: maņ retoriski vaicuojumi i jāgys mekliejumi, tev – puorticeiba i okla pasaļaušona iz kaidu augstuok stuovūšu balleišu spāku.

Ka kaidam ir ļuste ar mani padiskutēt ci oponēt, tod drūsai tū var dareit. Vysod ar interesi uzklausu cytu cylvāku redzīņus: ligija.purinasa@gmail.com.

Roksta i kartenis autore: Ligija Purinaša

Print Friendly, PDF & Email

Nūtikšonu kalendars

Apr
16
Pīk
14:00 Profesoris Lidejis Leikumys lekc... @ Tīšsaitē
Profesoris Lidejis Leikumys lekc... @ Tīšsaitē
Apr 16 @ 14:00
Profesoris Lidejis Leikumys lekceja "Sibīrijas latgalieši un viņu valoda" @ Tīšsaitē
Kruoslovys nūvoda centraluo biblioteka aicynoj iz Latvejis Universitatis profesoris i viesturneicys Lidejis Leikumys lekceju par Sibira latgalīšim – “Sibīrijas latgalieši un viņu valoda”.
Apr
19
Pyr
16:00 Imanta Magones atceris pasuokums @ Tīšsaitē
Imanta Magones atceris pasuokums @ Tīšsaitē
Apr 19 @ 16:00
Imanta Magones atceris pasuokums @ Tīšsaitē
Bolvu Centraluo biblioteka 19. aprelī aicynoj iz horeografa Imanta Magones atceris pasuokumu.