Kina “Pelikans tuksnesī” īkļauta festivala programā Austrejā

Kina “Pelikans tuksnesī” īkļauta festivala programā Austrejā

Režisora Vīstura Kairiša i operatora Ginta Bierzeņa dokumentaluo kina Pelikans tuksnesī nu 2. leidz 11. oktobram byus apsaverama Austrejā nūteikūšajā Let’s Cee kinu festivalā, kas īpazeistynoj Austrejis skateituojus ar kvalitativu kino nu Centraluos i Austrumeiropys vaļstu. Pelikans tuksnesī ir vīna nu deveņu ituo gods dokumentalūs kinu konkursa kinu. Iz Vīni sastikt ar austrīšu skateituojim brauc ari režisors Vīsturs Kairišs.

Let’s Cee kinu festivalā dokumentalūs kinu konkursa programā īkļautys i vizuali īspaideigys i poetiskys, i sociali i politiski aktivys kinys. Lela viereiba festivalā veļteita taišni Ukrainys-Krīvejis konfliktam. Programā īkļauta Krīvejis-Igaunejis kūpražuojuma kina par Krīvejis opozicejis līderim šaļti pyrma Ukrainys krīzis suokuma – The Term (Termeņš), kurys režisori ir Aleksejs Pivovarovs, Pavels Kostomarovs, Aleksandrs Rastorgujevs. Kina Ukraine Voices (Ukrainys bolsi) pīduovoj ostoņu jaunu ukraiņu režisoru skatejumu iz Ukrainā nūteikūšū. Sovukuort īvāruojamais ukraiņu izcelsmis režisors Vitālijs Manskis sovā kinā The Pipeline (Gāzis vods) vāroj gāzis voda byuvnīceibu i vysaidu vaļstu cylvākus, kū itys projekts vīnoj i škir.

Festivala ītvorūs teik organizātys ari eipašys kinu programys, par pīmāru, pretkara kinu programa – festivala veļtejums Pyrmuo pasauļa kara symtgadei i Ūtruo pasauļa kara 75. godskuortai.
Kūpumā festivals demonstrej ap 80 kinu – i spēlkinys i dokumentaluos kinys, i eiskinys. Bolva par myuža īguļdejumu festivalā itūgod tiks padūta izcilajam ungaru režisoram i scenaristam Ištvanam Sabo.

Dreiži piec tikšonuos ar skateituojim Austrejā Pelikans tuksnesī ceļuos iz Vuoceju, kab oktobra beiguos pīsadaleitu Zīmeļvaļstu kinu dīnuos Lībekā.

Kai īprīkš viesteits, dokumentaluo kina Pelikans tuksnesī ir episks viestejums par režisoram tyvū Latgolu, tuos eipašū mageju i ari pūstu. Pastuoveiguo religejis kluotynbyutne, cylvāku kasdīnys dzeivis rytums, dobys dyžanums, dzeiveiba i nuove – tys vyss operatora Ginta Bierzeņa gleznuotajūs skotūs sasavyn ar Gustava Mālera muzyku, rodūt pīminekli zemei, kuru kinorežisors sauc par myusu gaistūšū Atlantidu.
Kinys pasauļa pyrmizruode nūtyka 28. aprelī Šveicē – prestižajā dokumentalūs kinu festivalā Visions du Réel, kur tei tyka demonstrāta pylnmetražys kinu konkursa programā.

Print Friendly, PDF & Email

Kalenders

Apr
18
Cat
12:00 Latgolys dīna @ Vacsalīnys muižys piļs
Latgolys dīna @ Vacsalīnys muižys piļs
Apr 18 @ 12:00 – 14:00
Latgolys dīna @ Vacsalīnys muižys piļs
19:00 Grupys “Galaktika” albuma prezen... @ Aizkrauklis kulturys centrs
Grupys “Galaktika” albuma prezen... @ Aizkrauklis kulturys centrs
Apr 18 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]