Laikmeteiguos muokslys centra izstuode i izgleiteibys programa Rēzeknē

Laikmeteiguos muokslys centra izstuode i izgleiteibys programa Rēzeknē

Itūgod nu 16. leidz 31. oktobram Rēzeknē, Austrumlatvejis rodūšūs pakolpuojumu centrā “Zeimuļs” byus apsaverama Latvejis Laikmeteiguos muokslys centra (LLMC) veiduotuo izstuode “Piecas versijas. Piezīmes par kādu laikmetu”, kura vairuoku kuratoru i muokslinīku eksperimentalā sadarbeibys formatā pīduovuos īpazeit atškireigus redzīņus iz Latvejis laikmeteigū muokslu. Izstuodis rodūšī impulsi i materialu interpretacejis vierzīni tyka vaicuoti LLMC datu bazā i arhivā, kas veiduots i papyldynuots nu 20. godu symta 90. godim i ir leluokuo informacejis kruotuve par Latvejis laikmeteiguos muokslys procesim. Izstuodi papyldynoj saistūša izgleiteibys programa “Lielā lupa”, kai ari lekceju sereja i video programa “Jaunākā kustīgā attēla māksla Baltijā”. 

Izstuode pīsavierš arhiva kai nūzeimeiga kulturys kruojuma potencialam, apsaverūt tū kai daudzpuseigu informacejis nesieju, dinamisku i maineigu procesu, kas veidoj i puorformulej attīceibys ar viesturi. Muokslinīku i kuratoru rodūšajūs tandemūs izvārstī stuosti puornas akcentus nu vyspuoreiguo (dokumentu, attālu i faktu bezgaleibys) iz konkretū, ari subjektivū, tīcūtīs īsaisteit skateituoju kai aktivu arhiva i muokslys dorbu lītuotuoju.

Izstuodis rodūšū komandu veidoj storpdisciplinara kuratoru i muokslinīku grupa: muokslys zynuotnīks i kritiks Juoņs Borgs kūpā ar muokslineicu Lauru Feldbergu, kuratore i muokslys zynuotneica Līga Lindenbauma – ar dizaineru Kristapu Grundšteinu, muokslys zynuotneica Aiga Dzalbe – ar muokslinīkim Kristapu Epneru i Īvu Epneri i operatori Baibu Legzdeņu, publicists i antropologs Haralds Matulis kūpā ar muokslineicu Īvu Sauleiti.

Izgleiteibys programa “Lielā lupa” veiduota, izmontojūt Latvejis Laikmeteiguos muokslys centra arhivā atrūnamuos līceibys par Latvejis laikmeteiguos muokslys nūtikšonom. Programys mierkis ir interesantā veidā īpazeistynuot skateituojus i ar laikmeteiguos muokslys volūdu, i ar Latvejis muokslys i kulturys viesturi. Ar digitalu i analogu spēļu paleidzeibu byus vareiba lobuok īpazeit muokslinīkus, pieteit muokslys dorbus, īpazeit aktualuos nūtikšonys Latvejis laikmeteigajā muokslā, kai ari radeit jaunus muokslys dorbus. Izgleiteibys programa adresāta lelai auditorejai – i bārnim, kas vēļ tik vuicuos muokslys pamatus, i vysa vacuma pīaugušajim.

Izstuodē “Piecas versijas. Piezīmes par kādu laikmetu” izgleiteibys programys “Lielā lupa” ītvorūs dorbuosīs:

Mozūs pietnīku darbneica – vīta pošim mozuokajim izstuodis apmaklātuojim (nu 6 mienešu leidz 5 godu vacumam) i jūs vacuokim. Te atsarūn vysaidys muokslys dorbūs baļsteitys atteistūšuos rūtaļlītys – kūka puzlis i spēlis, kas vuica veiduot formys, pazeit kruosys, atteista viereibu i pierstu veikleibu.

Muokslinīku dorba golds vysim, kas muok turēt rūkā zeimuli, dorbuotīs ar škērem i leimi. Tymā byus atrūnamys vysaidom vacuma grupom pīmāruotys dorba lopys, kas paradzātys kruosuošonai, zeimiešonai, atjauteibys aizdavumu rysynuošonai i treisdimensionalu modeļu veiduošonai.

Lelais dators ir programys elements, kas ļaun īsavērt Laikmeteiguos muokslys centra arhivā – īpazeit laikmeteigū muokslu i muokslinīkus, pietejūt foto materialus i video intervejis, pošim digitali izveiduot izstuodis ekspoziceju voi kaida muokslys festivala plakatu, kai ari ar myusu dīnu tehnologeju paleidzeibu byut par Mīrvalža Pūļa “Bronzys cylvāku”.

Atjauteibys spēlis školānim ir izgleiteibys programys daļa, kas paradzāta školānu grupom (jaunuokuo školys vacuma, pamatškolys pādejūs klašu, vydsškolys). Tūs mierkis ir īinteresēt ar spēlis paleidzeibu, pīvieršūt viereibu konkretom muokslys paruodeibom i tūs izpratnei.

Konkurss par lobuoko repliku kaidam nu LLMC arhiva muokslys dorbim – paradzāts vysa vacuma auditorejai. Dalinīku aizdavums – izveiduot ospruoteigu komentaru par kaidu muokslys dorbu poša izvālātā formā – dzejā, video, gleznā, zeimiejumā, treisdimensionalā voi performativā dorbā. Lobuokuo dorba autors bolvā sajims vareibu pušdīņuot kūpā ar poša izvālātu muokslinīku.

Sovukuort Annys Veilandis Kustikovys veiduotajā lekceju serejā i video programā “Jaunākā kustīgā attēla māksla Baltijā” byus apsaverami Baļtejis kusteiguo attāla muokslys dorbi, kas radeiti, kab raiseitu skateituojā vizualu baudejumu i puordzeivuojumu, reizē i tematiski, i stilistiski reflektejūt par myusu dīnu kulturā aktualom tendencem. Lekceja i video programa byus apsaverama 31. oktobrī 17.00.

Izstuodis kuratore – muokslys zynuotneica Andra Silapētere

Izstuodis īkuortuojums i dizains – Asnate Bočkis

Izgleiteibys programys idejis autore i projekta vadeituoja – Linda Veinberga

Projekts radeits ar Vaļsts Kulturkapitala fonda i Aizkrauklis Bankys Lobdareibys fonda atbolstu

Print Friendly, PDF & Email

Kalenders

May
24
Pīk
22:05 Raibīs. Pyrma syltī. Zalta tesmi... @ Latvejis Radio 1
Raibīs. Pyrma syltī. Zalta tesmi... @ Latvejis Radio 1
May 24 @ 22:05 – 23:00
Raibīs. Pyrma syltī. Zalta tesmini. Radejis skaitejumi @ Latvejis Radio 1
Turpynojūt latgalīšu myusu dīnu literaturys īmyužynuošonys i populariziešonys dorbu, nu 21. da 24. maja Latvejis Radejis 1 eterā pyrmū reizi skanēs latgalīšu prozys dorbu izlase – stuosti i esejis, kuru autori ir Annele Slišāne, Valentins[...]
May
25
Sai
19:00 Grupys “Raxtu Raxti” i “Sinfonie... @ koncertzāle "Lielais Dzintars"
Grupys “Raxtu Raxti” i “Sinfonie... @ koncertzāle "Lielais Dzintars"
May 25 @ 19:00 – 21:00
Līpuojis koncertzālis pavasara sezonys nūslāgumā iz leluos skotivis varēs pīdzeivuot eipašu mageju, kū veiduos mejīdarbeiba tautys i akademiskuos muzykys vydā – grupa “Raxtu Raxti” i kamerorkestris “Sinfonietta Rīga” dirigenta Normunda Šnē vadeibā. Kūpeigajā koncertprogramā skanēs[...]