Latgolys koru sasadzīduošonys svātki Daugovpilī
18. oktobrī. 16.00 Daugovpilī, Vīneibys noma koncertzalā nūtiks Latgolys koru sasadzīduošonys svātki “Ceļā iz Latgolys dzīšmu svātkim”.
Latgolys koru sasadzīduošona Daugovpilī nūteik jau catūrtū reizi, i kotru reizi tei īnas jaunys vāsmis kora muzykys populariziešonā. Itūgod koru sasadzīduošonys vadmotivs ir “Ceļā iz Latgolys dzīšmu svātkim”, tī nūtiks 2015. goda junī Daugovpilī, Strūpu estradē. Koč i ceļš iz svātkim vēļ ir goda garumā, nu dorbs pi tim jau nūteik kotra kora gataveišonuos procesā. 18. oktobrī Vīneibys noma koncertzalā byus vareiba dzierdēt i koru jaunīstudiejumus, i Latgolys kora dzīšmu klasiku, tymā skaitā “Aiz azara bolti bārzi”, “Aiz azara augsti kolni”, “Skaidruo volūda” i cytys.
Koncertā pīsadaleis: Aglyunys bazilikys jauktais kors “Assumpta”, vadeituoja Īva Lazdāne; Bolvu nūvoda jauktais kors “Mirklis”, vadeituojs Uldis Kokars; Daugovpiļs Latvīšu kulturys centra jauktais kors “Daugava”, vadeituojs Jevgenijs Ustinskovs; Daugovpiļs nūvoda kulturys centra jauktais kors “Latgale”, vadeituoja Anita Zarāne; Kruoslovys nūvoda KN sīvīšu kors “Nova”, vadeituoja Rita Andrejeva; Preiļu nūvoda školuotuoju kors “Latgale”, vadeituojs Edgars Znutiņš. Kūpā ar dzīduotuojim i koru dirigentim koncertā pīsadaleis ari Latgolys koru sasadzīduošonys iniciatore, cīnejamuo Dzīšmu svātku Gūda viersdirigente Terēze Broka.
