Daugovpiļs teatrī nūtykuse pyrmizruode “Eisa pavuiceiba mīliešonā”

Daugovpiļs teatrī nūtykuse pyrmizruode “Eisa pavuiceiba mīliešonā”

23. oktobrī Daugovpiļs teatrī, atkluojūt jaunū sezonu, pyrmizruodi pīdzeivuoja muzykali dinamiska izruode, Rūdolfa Blaumaņa goradorbs “Eisa pavuiceiba mīliešonā” (“Īsa pamācība mīlēšanā”). Jaunīstudiejums ar maestro Raimonda Paula muzyku, Oļega Šapošņikova režijā, scenografa Kristapa Skultis i mūdis muokslinīka Dāvida vizualajā nūformiejumā.

Rūdolfa Blaumaņa “Eisa pavuiceiba mīliešonā” pādejū reizi īstudāta 70. godūs Dailis teatrī, niu, piec 40 godu, Daugovpiļs teatrī. Iestudiejuma idejis iniciatori – poši Daugovpiļs teatra akteri, i kai uzsver režisors Oļegs Šapošņikovs: “Rūdolfa Blaumaņa “Eisai pavuiceibai mīliešonā” taipat kai “Skrūderdīnom Silmačūs” ir sova lūma Latvejis teatra muokslā, i itys uzvadums Daugovpiļs teatrī, jau niu drūši ir saucams par vierīneiguokū itamā sezonā.” Izruodis taiseišonā tyka daaicynuoti vairuoki profesionāli, jau īprīkš pīmynātī muokslinīki – Dāvids (Romāns Andrejevs) i Kristaps Skulte, muzykys aranžātuojs nu Vuocejis Hermanis Rigmants, gostu akteri – Ineta Radčenko, Laura Atelsone i Juoņs Kirmuška, nu par vokaluo snāguma kvalitati ryupejās LNO soliste Ilona Bagele. Juoņs Kirmuška, kurs izruodē ir teicieja lūmā, stuosta: “Ir cīši pateikamai sasastruoduot ar Daugovpiļs teatra komandu – pa pyrmam, ir režisors, kurs zyna, kū gryb i kai tū panuokt, i breineigi kolegi – tik atsauceigi akteri nav nikur!” Ilzis lūmys atveiduotuoja Laura Atelsone (M. Gruzdova akteru kursa absolvente), pīsavīnojūt Juoņam pībylst, ka itei ir bejuse naatsverama pīredze, i kai jaunajai aktrisei tys ir lobs suokums tuoluokajai karjerai.

“Eisa pavuiceiba mīliešonā” Daugovpiļs teatrī ir na tik tradicionala i paradzama, kai varātu liktīs. Izruode – ar “huliganiskim guojīnim” i tārpūs, i muzykā, puorsteigumim i knifim, vysam cauri vynūt dūmu par latvīšim kai tautu ar sovu raksturu. Naizpalīk ari humora dzierksts, partū ka kai uzsver aktrise Kristīne Veinšteina: “Itei byus tei reize, kod mes, latvīši, varēsim pasasmīt poši par sevi, tai labesteigi i sirsneigi.” Rodūšuo komanda atzeimoj, ka jaunīstudiejums golvonūkuort ir dūmuots prīcai, partū skateituoji teik meilai aicynuoti iz izruodem, kab kūpā tyktu pi pozitivu emoceju i atsapyustu.

Rūdolfs Blaumanis, Raimonds Pauls
EISA PAVUICEIBA MĪLIEŠONĀ (ĪSA PAMĀCĪBA MĪLĒŠANĀ)
Tautys komedeja ar Latvejis zalta fonda šlagerdzīsmem
Režisors – O. Šapošņikovs, scenografs – K. Skulte, kostimu muokslinīks – Dāvids (R. Andrejevs), horeografe – I.Saveļjeva, gaismu muokslinīks – S.Vasiļjevs, vokaluo repetitore – I. Bagele, muzykys aranžiejumi – H. Rigmants (Vuoceja).
Lūmuos: J. Kirmuška, M. Korsiets, I. Brakovskis, A. Krasteņa, M. Korkliša, I. Radčenko,
K. Veinšteina, L. Ivanova, L. Atelsone, R. Gailums, J. Losevs, E. Viļumovs.

Darbeiba nūteik laukūs, kur Viļņu Juoņs izmiseigai vaicoj sev dzeivisbīdri. Pretendentis ir vysaidys – skaistys, čaklys i krītnys, nu, kod tu daej pavysam tyvu kluotyn, redzi, ka nav vys tai, kai ļauds runoj. Itaiduos reizēs līti nūder viļteiba, caur kū tod ar var atrast tū eistū i vīneigū.

Tyvuokuos izruodis – 9. novembrī 17.00 i 21. novembrī 18.30.
Beleti – Daugovpiļs teatra kasē (65426520) i škārsteiklā www.bilesuparadize.lv
Vaira informacejis – www.daugavpilsteatris.lv

Kartenis: Džeina Sauleite

Print Friendly, PDF & Email

Kalenders

May
29
Tre
18:00 “Pauls un Keišs. Vīrieši labākos... @ Muzykys noms "Daile"
“Pauls un Keišs. Vīrieši labākos... @ Muzykys noms "Daile"
May 29 @ 18:00 – 20:00
Latvīšu estradē, latvīšu teatrūs i Latvejis politiskajā dzeivē ir daudz veirīšu lobuokūs godūs. Iz skotivis byus diveji – vīns nu estradis i džeza, ūtrys nu teatra i kinys pasauļa. Tok – kotrys nu prīšknasumu var[...]
19:00 Grupys “Saucējas” koncerts i daņ... @ Reiga
Grupys “Saucējas” koncerts i daņ... @ Reiga
May 29 @ 19:00 – 21:00
Latvejis Kulturys akademejis tradicionaluos dzīduošonys grupa “Saucējas” trešdiņ, 29. majā, 19.00 aicynoj is koncertu Āgenskolā Pāvula Jurjāna muzykys školys estradē, Bolūžu īlā 24. 
May
30
Cat
13:00 Daugovpiļs piļsātys svātki @ Daugovpiļs
Daugovpiļs piļsātys svātki @ Daugovpiļs
May 30 @ 13:00 – Jun 2 @ 19:00
Nu 31. maja da 2. juņa Daugovpiļs piļsāta svieteis sovu 749. dzimšonys dīnu, aicynojūt daugovpilīšus i gostus iz kūpeigom svineibom – piļsātys svātkim „Mana pils – Daugavpils!”. Treis dīnu garumā byus vareiba baudeit vysaidys koncertprogramys,[...]