“Uguntiņa” īsamirdzēja Upeitē

“Uguntiņa” īsamirdzēja Upeitē

24. oktobrī Upeitis Tautys nomā beja paguojušuo godu symta ostoņdasmytūs godu atmosfera. Kai pyrma 30 godu jaunīši nu vysaidu kolhozu sabrauce iz sadraudzeibys turniru “Uguntiņa”, tai ari tādiņ sabrauce četrys jaunīšu komandys nu Viļakys nūvoda i vīna komanda nu Baļtinovas nūvoda: “Kļošenes”  nu Upeitis, “Pioneri” nu Rekovys, “Medņevieši” nu Medņovys, “Draiskās Dīvas” nu Viļakys nūvoda dūmis i “Baļtinova” nu Baļtinovys.

Turnirā vyscaur atmosfera beja kai tymūs tuolejūs godūs, i dalinīku drēbis, i zala rūtuojums, i izdareibys, kai ari muzyka. Kai tymūs godūs, tai ari niu kotra komanda beja ar sovu nūsaukumu, devizi i sātys dorbu – skečeņu, kas kotrai komandai beja breineigi jauks.

Vokora gaitā, tyka izspieļuotys vysaidys atrakcejis, spēlis i aizdavumi, par kurim komandys vuoce žetonus, kab varātu nūskaidruot, kurys komandys ir vyslobuokuos i kura byus tei, kura sajims ceļojušū vimpeli ar aizdavumu piec goda sareikuot nuokušū sadraudzeibys turniru “Uguntiņa” i aicynuot komandys pi seve.

Piec daudzajim puorbaudejumim i skrīšonā, i ruopuošonā, doncuošonā, liekšonā, hokeja spēlē, zeimiešonā, reklamu gataveišonā i daudzuos cytuos, gondreiž tyvojūtīs pusnaktei, tyka skaiteiti žetoni, i izaruodeja, ka vysys komandys beja pošys lobuokuos, nu vys vīna komanda beja vyslobuokuo, partū ka sajēme ceļojūšū vimpeli i vareibu aicynuot draugus pi seve. Tei beja komanda “Draiskās Dīvas” nu Viļakys nūvoda dūmis. Kai komanda saceja, cytugod sasatiksim Medņovys Tautys nomā.

Paļdis komandom i skateitojim par lelū atsauceibu!

Upeitis Tautys noma vadeituojs Andris Slišāns

Print Friendly, PDF & Email

Nūtikšonu kalendars