“Ielas garumā” par Tuolovejis īlu Ludzā
Itūvosor raidejuma “Ielas garumā” ceļuojuma golamierkis beja austrumu pīrūbežys piļsāta Ludza – vacuokuo Latvejis piļsāta, apmāram 270 kilometru tuoli nu Reigys. Piļsāta, kurys vaibsti ir i multikulturali, i daudznacionali, tok styngrai sagloboj sovu latgaliskū sakni. Treis raidejumūs tiks vaicuots piļsātai rakstureigais vairuoku īlu garumā, nu suokts teik ar vacuokū piļsātys īlu – Tuolovejis īlu. Tei aizavyn Ludzys piļskolna pakuojē storp Lelū i Mozū Ludzys azaru i par speiti pūstūšajim guņsgrākim saglobuojuse senejū kūka apbyuvi, kurā var saredzēt vysaidu tauteibu omotnīku rūkrokstu. Izkuopūt Ludzys piļskolnā, Tuolovejis īlys pogolmu dzeive atsakluoj kai iz dalnys, nu, ībraucūt ar plūstu azarā, var redzēt tik skaistu panoramys skotu, ka elpa aizaraun.
