Latgolys viestnīceibā GORS byus apsaverama Latvejis naudys dizaina izstuode

Latgolys viestnīceibā GORS byus apsaverama Latvejis naudys dizaina izstuode

Latvejis vaļstei zeimeigā dīnā, 18. novembrī, Rēzeknē, Latgolys viestnīceibā GORS, tiks atkluota unikala multimediala izstuode “Naudys dizains. PIN kods”. Tamā leidz pat 2015. goda 15. februaram varēs īpazeit vaira nakai 20 godūs paveiktū lata banknošu, monetu i niu ari Latvejis eiro monetu dizaina veiduošonā. Kai zynoms, Latvejis naudys dizains ir vīna nu Kulturys kanonā īkļautajom vierteibom.

Izstuode “Naudys dizains. PIN kods” ir 2013. goda pavasarī Latvejis Bankā izruodeituos multimedialuos ekspozicejis “Ls • 20. Nacionaluos valūtys muokslys godi” turpynuojums i atdzimšona jaunā kvalitatē. Izstuodi “Ls • 20. Nacionaluos valūtys muokslys godi”, kura dabuojuse zalta medaļu konkursā “A’ Design Award” īšktelpu i izstuožu dizaina kategorejā, Latvejis Bankys telpuos Reigā, K. Valdemara īlā, kūpumā apsavāruši apmāram 10 000 interesentu.

Kab nūdrūšynuotu vareibu ari regionu dzeivuotuojim īpazeit Latvejis naudys zeimu dizainu, Latvejis Bankys saturiski i vizuali pylnveiduotuo ekspoziceja itūvosor beja Ventspiļs muzejā, i nu novembra tū varēs redzēt Latgolys viestnīceibā GORS. Ventspilī izstuodi nu 2014. goda 2. juļa leidz 30. septembram apmeklēja vaira nakai 19 000 cylvāku.

Latvejis Bankys izstuodi veiduojs dizaina birojs “H2E”, audiovizualuos tehnologejis nūdrūšynuojs SIA “SOLAVI”, multimedejus izstruoduojuse Jura Pūdnīka kinu studeja, muokslinīku fotoportretu autore ir Santa Savisko–Jēkabsone.

Vaira nakai 40 izcyluokūs Latvejis muokslinīku veiduotuos naudys zeimis Latgolys viestnīceibā GORS dūs stuostu par naudys i personeibys attīceibom telpā i laikā. Digitaluos slaidruodis īvess naudys dizaina autoru – gleznuotuoju, instalaceju autoru, gruomotu ilustratoru, tielnīku i daudzu cytu muokslys nūzaru puorstuovu dorbustobuos, monitorā atsadzeivuos mums tik meiluos 1 lata monetys ar eipašu dizainu, nu pi interaktivuo dorbagolda kūpā ar muokslinīkim varēs zeimēt sovu monetu.

Multimedialuo izstuode “Naudys dizains. PIN kods” paruoda vysys 20 godu laikā radeituos naudys zeimis, tūs topšonys viesturi, kaidu romantisku mitu par muokslinīku i juo mūzu, ari naseņ koltuos eiro monetys i tikū topušuos skicis tom monetom, kurys pavysam dreiž īraudzeisim i Latvejā, i vysuos Eirozonys vaļstīs.

Izstuodis sātyslopa ar aktualū informaceju i grupu dasasaceišonys vareibom – www.naudasdizains.lv. Eipaši aicynuotys školu grupys – izstuodē dorbuosīs gidi i rodūšuo darbneica, tai ka byus interesanti i izzynūši mozuokim i leluokim školānim nu vyspuorizgleitojūšom i eipaši – muokslys školom.

Izstuodis laikā paradzāti ari diveji eipaši pasuokumi – rodūšuos tikšonuos ar muokslinīkim. 2015. goda 21. janvarī nūtiks tikšonuos ar muokslinīku Henrihu Vorkalu, kurs veiduojs četru lata jubileja i pīminis monetu, vīnys 1 lata apgrūzeibys monetys (“Čīkurs”), kai ari pyrmuos Latvejis Bankys emitātuos 2 eiro pīminis monetys (“Reiga – Eiropys kulturys golvyspiļsāta 2014”) grafiskū dizainu.

Sovukuort 2015. goda 11. februarī Latgolys viestnīceibā GORS byus tikšonuos ar izstuodis veiduotuojim Ramonu Umbliju i Holgeru Eleru, kuri stuosteis par modernūs izstuožu saturu i formu.

Izstuodi 18. novembrī 15.30 Latgolys viestnīceibā GORS atkluos tuos vadeituoja Diāna Zirniņa, Rēzeknis piļsātys dūmis prīšksādātuojs Aleksandrs Bartaševičs i Latvejis Bankys prezidents Ilmārs Rimšēvičs.

Reizē ar izstuodis atkluošonu tiks prezentāta nuokamuo Latvejis Bankys kolekcejis moneta – “Godskuortu moneta”, par kū stuosteis tuos autors Arvīds Prīdeite i literaturzynuotneica Janina Kurseite. Prīdeite ir vairuoku eipašuo dizaina 1 lata, kai ari jubileja i pīminis monetu autors, tamā storpā 2004. godā serejā “Latveja. Laikmatu grīži i laikmatu vierteibys” izlaistuos Latgolys monetys grafiskuo dizaina autors.

Print Friendly, PDF & Email

Kalenders

May
30
Cat
13:00 Daugovpiļs piļsātys svātki @ Daugovpiļs
Daugovpiļs piļsātys svātki @ Daugovpiļs
May 30 @ 13:00 – Jun 2 @ 19:00
Nu 31. maja da 2. juņa Daugovpiļs piļsāta svieteis sovu 749. dzimšonys dīnu, aicynojūt daugovpilīšus i gostus iz kūpeigom svineibom – piļsātys svātkim „Mana pils – Daugavpils!”. Treis dīnu garumā byus vareiba baudeit vysaidys koncertprogramys,[...]
13:00 Sasatikšona ar Juri Cybuli @ Reigys Centraluos bibliotekys Grīziņkolna filialbiblioteka
Sasatikšona ar Juri Cybuli @ Reigys Centraluos bibliotekys Grīziņkolna filialbiblioteka
May 30 @ 13:00 – 14:30
30. majā 13.00 stuņdēs RCB Grīziņkolna filialbiblioteka (Alauksta īlā 10) aicynoj iz sasatikšonu ar Juri Cybuli. Jurs Cybuļs ir volūdnīks, tulkuotuojs, publicists i školuotuojs, kurs vaira nakai 40 godu pietej i kolekcionej ābecis. Jurs Cybuļs[...]