Ludzā nūtiks ūtruo handbola zvaigžņu spēle

Ludzā nūtiks ūtruo handbola zvaigžņu spēle

Latvejis handbola Viersleigys ūtruo Vysu Zvaigžņu spēle nuokamuo goda 14. martā nūtiks vīnā nu vaļsts handbola lelpiļsātom Ludzā.

“Ludza ir vīns nu myusu leluokajim handbola centrim vaļstī. Ite ir lela pošvaļdeibys interese organizēt handbola pasuokumus i atteisteit itū sporta veidu. Itei byus nūzeimeiga i eipaša nūtikšona vysā regionā,” Zvaigžņu spēlis vītys izvieli paskaidruoja Latvejis Handbola federacejis generalsekretars Anrijs Brencāns.

Spēlis suokumsastuovu (septeņus spālātuojus kotrā nu komandu) škārsteikla bolsuojumā, kas suoksīs janvarī, izavielēs leidzjutieji, nu vēļ pa septenim spālātuojim izavielēs Austrumu i Rītumu komandu treneri. Zvaigžņu spēlis storplaikūs nūtiks ari vysaidi konkursi spālātuojim.

Pyrms Zvaigžņu spēlis nūtiks regionals mini handbola turnirs, kai ari Latvejis sīvīšu handbola Viersleigys spēle storp “Latgols” i “Salaspils SS” komandom.

Pyrmuo Zvaigzņu spēle ituo gods 22. martā nūtyka Dūbelē, i tamā Austrumu komanda ar 55:51 puorspieja Rītumus, nu par MVP aba vierteiguokū spālātuoju tyka atzeits Austrumu puorstuovs Egils Politers (Austrumi / Dūbelis “Tenax”).

Karteņa: Juris Bērziņš-Soms, handball.lv

Print Friendly, PDF & Email

Nūtikšonu kalendars