2009. godā Ludzys nūvoda i Glubokoje pošvaļdeibys realizēja pyrmū kūpeigū projektu “Latvīšu i boltkrīvu folklorys tradiceju vizualizaceja puorrūbežu muokslys tylta izveidē”, ituo projekta ītvorūs Glubokoje piļsētā tyka attaiseita Glubokoje muokslys škola, nūsastyprynuoja cīša sadarbeiba storp ituom divejom īstuodem. Projekts veicynuoja pīrūbeža jaunīšu izpratni par latvīšu i boltkrīvu nacionaluos kulturys kūpeibu i sovdabeibu, paleidzēja atteisteit rodūšū izdūmu i muokslinīciskū gaumi, izmontojūt modernuos tehnologejis. Sovukuort projekts “Izgleiteibys apstuokļu uzlobuošona muokslys montuojuma saglobuošanai Latvejā i Boltkrīvejā puorrūbežu sadarbeibys ītvorūs” aba saeisynuoti “Virtualuo realitate” Nr.LLB-2-244 ir ituos sadarbeibys turpynuojums.

Projekta mierkis ir veicynuot muokslys uorpusškolys izgleiteibu Latvejis i Boltkrīvejis pīrūbežu zonā, reikojūt kūpeigys aktivitatis sadarbeibys styprynuošonai muokslys izgleiteibys jūmā. Itys projekts sasaista muokslu i modernuos tehnologejis, nacionaluos kulturys i muokslys vierteibys skota cytā dimensejā, pīškir nuokūtnis vīzeju, nu naaizmierst ari par tom vierteibom, kurys ir atzynuši myusu seņči. Paguotne, tagadne i nuokūtne: senejais, pastuovūšais i modernais caurvyn projekta eistynuošonys gaitu. Virtualuo realitate – tys nūzeimoj, ka sadarbeibai rūbežu nav. Projekts pīruoda tū, ka izmontojūt IT tehnologejis ir īspiejams na tik sasazynuot, nu ari eistynuot vuiceibu procesu, dabuot zynuošonys virtualūs stuņžu laikā.

Projekta ītvorūs tyka izremontietys Ludzys i Glubokoje muokslys školys, īguoduotys mebelis i IT apreikuojums, t.sk. interaktivuo tāfele, nūtyka pedagogu apvuiceibys, kai lītuot jaunuokuos tehnologejis taišni muokslys izgleiteibys procesā. Teik izstruoduots Metodiskais materials i izveiduots kūpeigs produkts – kruosojamuo gruomota par diveju Latgolā i Glubokoje zynomu muokslinīku: A. Kūkuoja i J. Drozdoviča dzeivis faktim i daiļradi.

Laika pūsmā nu 20. novembra leidz 23. novembram Ludzā nūtyka projekta nūslāguma pasuokums, kurymā pīsadaleja Ludzys i Glubokoje muokslys školu audziekni i pedagogi. Kūpeigā dorbā jaunīši īpazyna sova nūvoda popularuokūs muokslinīku ieguļdejumu kulturā i muokslā. Ludzys muokslys školys pedagogi boltkrīvu bārnus īpazeistynuoja ar Ontona Kūkuoja daiļradi, muokslu. Pasuokuma laikā tyka apmaklāta muokslinīka dzymtuo vīta Rogovkā, Nautrānu škola, muokslinīka kopavīta, kai ari Kūkuoja pīminekls Rēzeknē.

21 bārna sirdīs teik īsāta siekleņa ar dūmu par tū, ka dzymtuos zemis skaistums, kultura, viesture ir tys duorgums, kas juolūloj, juosorgoj, juoizzīdynoj i juonūdūd tuoļuok cytom paaudzem. Leidzeigi kai tū ir darejušys paaudzis pyrms myusu. Ontona Kūkuoja davums Latgolys kulturā i muokslā ir dzeivs laikabīdru atmiņuos i nav puosakluojs ar putekļu kuortu, kas dūd vareibu nūdrūšynuot tīšu puormontuojameibu i jiutu pasauļa kluotynbyutni komunikacejā. Partū nūslāguma pasuokumu, kurymā Latvejā, Ludzā sasateik 11 bārnu nu Glubokoje i 10 bērnu nu Ludzys, vīns nu aizdavumu ir ļaut sajust, pīdzeivuot – kai garšoj Latgolys iedīni, kai izaver Latgolys lauku sāta myusu dīnuos, kurā dzeivuoja O. Kūkuojs, kai tys ir – nest gaismu tymsā luopu guojīnā iz Ludzys piļsdrupom (leidzeigi kai Andryvs Jūrdžs deve gora gaismu drukys aizlīguma laikā Latgolā), kai skaņ tradicionalī muzykys instrumenti tautys muzykanta Gunāra Igauņa izpiļdejumā i kai tī skaņ bārnu rūkuos improvizietā projekta orkestrī. Projekta nūslāguma pasuokumu intensitate praseja i nu bērnu, i pedagogu īkšejū spāku mobilitati i “izkuopšonu” nu kasdīnys ryupu i gaitu ritma, padorūt projekta laiku par eipašu.

Nūslāguma pasuokuma dalinīki gasteja laikmeteiguos muokslys, kulturys i izgleiteibys centrā Daugovpilī – Marka Rotko muokslys centrā, kur tyka apsavārtys ekspozicejis, kurys veidoj Marka Rotko dorbu originali i reprodukcejis, digitaluo ekspoziceja par muokslinīka dzeivi i daiļradi, kai ari kulturviesturiskuos ekspozicejis.

[Show slideshow]

Roksta autoris: Ludzys muokslas školys direktore Sandra Vuorkale, projektu vadeituoja Ilona Mekša