Rēzeknē atkluos Zitys Inčirauskienis izstuodi “Rokstu zeimis”

Rēzeknē atkluos Zitys Inčirauskienis izstuodi “Rokstu zeimis”

17. decembrī 15 stuņdēs Latgolys Kulturviesturis muzejā (Atbreivuošonys alejā 102, Rēzeknē) nūtiks Zitys Inčirauskienis (Lītova) tekstilmuokslys izstuodis “Rokstu zeimis” atkluošona. Izstuode Rēzeknē apsaverama, pasasokūt sadarbeibai ar Latvejis Muokslys akademejis Latgolys filiali i Viļņys Muokslys akademeju. Izstuode apsaverama leidz 2015. goda 17. janvaram.

Zita Inčirauskiene ir tekstilmuokslineica i Viļņys Muokslys akademejis Telšu fakultatis docente, pasnādz studentim kompoziceju, kaligrafeju, struodoj ar studentim mūdis dizaina jūmā. Zita Inčirauskiene struodoj tekstilmozaikys, aplikacejis, izšyušonys, filciešonys tehnikā, veidoj ari telpiskus objektus, izmontojūt vylnu, lynu, zeidu, gipsu i cytus materialus.

Muokslys kritike Alge Dargiene par izstuodi roksta: “Boltūs karūgu paruode, kur apļa laukumūs izcaltys i akcentātys muokslinīciskys rokstu zeimis, pīduovoj unikalu kaligrafejis muokslys i tekstila kombinaceju Zitys Inčirauskienis izpiļdejumā. Ite ir i atsaucis iz meiļūs cylvāku sejom, i pīraksteitom idejom i patīseibom. Itī boltī karūgi var byut koč kas – Torys teistūkli, konceptuali eksperimenti voi malnī īroksti filca zuoboku ryupneicys viesturē. Boltuo auduma trauslajā eksisteņcē kai teikuma fragmentā kaids saskateis vierteigys idejis i lelys spēlis, tikpat labi – vīglumu byuteibā i gorā. Kaligrafeja ir koč kas cīši personisks i intims. Kotrs karūgs ir kai lopa nu Zitys Inčirauskienis gruomotys. Karūgi reizem ir sasakļuovuši kūpā rodūšajā gruomotā. Vīnkuorši škūrstit i skaitit tūs.”

Zita Inčirauskiene dzymuse 1951. goda 17. oktobrī Gruzdžiai, Šauļu rajonā. 1972. godā pabeiguse Telšu lītiškuos muokslys školu, 1982. godā absolvējuse Viļņys Muokslys akademeju. Lītovys Muokslinīku savīneibys bīdre, dzeivoj Telšu piļsātā i struodoj kai profesore Viļņys Muokslys akademejis Telšu fakultatē.

Rodūšuo dorba vierzīni ir tekstilmuoksla i kaligrafeja. Zita Inčirauskiene ir pīsadalejuse ap 50 muokslinīku grupu izstuodēs Lītovā, Krīvejā, Latvejā, Zvīdrejā, Sūmejā, Vuocejā, Ungārejā, Dīnvydkorejā, Dominikys Republikā, Italejā, Pūlejā, sareikuojuse 15 personalizstuodis.

Zita Inčirauskiene dorbojās kai kuratore studentu kaligrafejis muokslys izstuodēs, gruomotu grafikā i storpdisciplinarūs projektūs, kas saisteiti ar kaligrafeju. Skaita lekcejis i voda seminarus par kaligrafeju muokslys školuotuojim, školānim, augstškolu nu koledžu studentim.

Sajāmuse vairuokus nūzeimeigus apbolvuojumus: 2012. g. sajāmuse diplomu 5. nacionalajā Tekstilmuokslys biennalē “Es Man Mans” galerejā “Arka” Viļņā, 2009. g. – Lītovys Kulturys ministrejis rodūšū stipendeju, 2001. g. – Storptautiskuos Tekstilmuokslys biennalis “Maigais pasauļs” specialū bolvu M. K. Čurļuoņa Nacionalajā Muokslys muzejā Kauņā, Lītovā.
www.incirauskiene.lt

Karteņā: dorba “Kontrabanda” fragments, veļtejums lītaunīku gruomotu kontrabandistim (1864-1904)

Izstuode attaiseita:
Ūtardiņ, trešdiņ, catūrtdiņ, pīktdiņ 10.00-17.00
Sastdiņ 10.00-16.00
Svātdiņ, pyrmūdiņ – slāgta
Īīšonys moksa izstuodē: školānim, studentim – 0,50 €, pīaugušajim – 0,80 €

Print Friendly, PDF & Email

Kalenders

Mar
30
Sai
15:00 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 30 @ 15:00 – 16:30
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
Mar
31
Svā
all-day Izstuode “Latgales keramikas stā... @ Daugovpiļs Muola muokslys centrs
Izstuode “Latgales keramikas stā... @ Daugovpiļs Muola muokslys centrs
Mar 31 all-day
Da 31. marta Daugovpiļs Muola muokslys centra izstuožu zālē apsaverama Tautys lītiškuos muokslys studejis “Latgale” izstuode “Latgales keramikas stāsti”, kurā apkūpuoti studejis lobuokī dorbi, viestej informaceja Daugovpiļs piļsātys sātyslopā. “Kotrys dorbs sovā byuteibā ir unikals i naatkuortojams, kotram[...]