Atsaverūt iz „Katōļu Dzeivis” izdūšonys i nūslāguma gaitu

Atsaverūt iz „Katōļu Dzeivis” izdūšonys i nūslāguma gaitu

20. godsymta 80. godu beiguos Latvejis Trešuos atmūdys rezultatā nūtyka izmainis vysuos dzeivis jūmuos. Ituo apstuokļa īspaidā sasarūseja ari katuoļticeigī ļauds, kurim sovu presis izdavumu nabeja apmāram pusgodsymtu. Piec vaira nikai 48 godu puortraukuma 1989. goda janvarī ūtreiz suoce izīt ticeigūs žurnals „Katōļu Dzeive”. Aizsuokumūs žurnals kai religiski sabīdriskys mienešroksts izguoja laikā nu 1926. da 1940. godam, kod presis izdavuma darbeibu puortrauce padūmu vara.

Žurnala „Katōļu Dzeive” golv0nais mierkis nu atkuortuotys izīšonys beja atvēlēt izdavumā vītu gareidznīku rokstim. Žurnala redaktori nu izdavuma izīšonys ari ir bejuši gareidznīki, par pīmāru, A. Aglonietis, A. Ševelis. Redaktoris omotā leidz izdavuma darbeibys puortraukšonai 2014. goda beiguos beja Maruta Latkovska. Religiskuo tematika – kateheze, liturgejis vaicuojumi, moralis i etikys problematika žurnalā ījēme dominejūšu lūmu. Taipoš žurnalā varēja skaiteit publikacejis par sabīdryskim pasuokumim, literaturu i volūdnīceibu, gleznīceibu i kūktielnīceibu. „Katōļu Dzeivis” publikacejis kulturys jūmā atkluoja konkretuo perioda laikmeteigūs nūtykumus i sekmēja sabīdreibys informieteibu par muokslys nūrisem Latgolā.

Žurnalu izdeve vīnu reizi mienesī. Atjaunuotuos „Katōļu Dzeivis” pyrmais numers 1989. goda janvarī izguoja 50 000 eksemplarūs, godim īmūt, tiražys skaits sasamazynuoja. Tys izskaidrojams gon ar jaunu presis izdavumu rosšonūs, gon ar tū, ka „Katōļu Dzeivis” izdeviejim nabeja komercialu mierķu (žurnals tyka izdūts par zīduojumim i ījāmumim nu tuo puordūšonys).

Dorbs pi žurnala sagataviešonys nūtyka Viļānu tipografejā. Kod žurnala salykums beja gotovs, tū tuoļuok syuteja īspīsšonai, par pīmāru, iz Daugovpili, Modyuni, Rēzekni. Redakceja napuortraukti dūmuoja par „Katōļu Dzeivis” satura atsvaidzynuošonu, pylnveidojūt asūšuos i attaisūt jaunys nūdalis. Eipaša viereiba tyka pīvārsta izdavuma muokslinīcyskajam nūformiejumam, i godu rytumā tyka dūmuots, kai „Katōļu Dzeivi” padareit vizuali pīviļceiguoku, rokstus papyldynojūt ar fotografejom.

Lai gon žurnala „Katōļu Dzeive” nūsaukums līcynoj par latgaliska satura tematiku, vys tik vairumā publikacejis beja latvīšu literarajā volūdā, jo tyka nūlamts rokstus publicēt taidā volūdā, kaidā autors īsyutejs.

Atsaverūt iz „Katōļu Dzeivis” 25 pastuoviešonys godim, secynojams, ka žurnals beja nūzeimeigs starpinīks storp katuoļu Bazneicu i tautu, veicūt sova veida dialogu storp sabīdreibu i prīsterim. Kai ari „Katōļu Dzeive” pasaryupeja par latgaliskuos ideņtitatis saglobuošonu i populariziešonu, kas paleidzēja sabīdreibai nūsastyprynuot īškeji.

Vieleju Marutai Latkovskai i vysai „Katōļu Dzeivis” redkolegejai tuoluoku izaugsmi i izturēt laika puorbaudi.

Roksta autors: Daiņs Adijāns
Karteņa: Alexandra Mrozińska inne-jezyki.amu.edu.pl

Print Friendly, PDF & Email

Kalenders

Mar
2
Sai
18:00 Latgalīšu kulturys goda bolva “B... @ Latgolys viestnīceiba "Gors"
Latgalīšu kulturys goda bolva “B... @ Latgolys viestnīceiba "Gors"
Mar 2 @ 18:00 – 20:30
Kotru godu Latgalīšu kulturys goda bolvys “Boņuks” padūšonys ceremoneja ir na tik atsavieršona iz pārnajā godā padareitū, tok ari latgalīšu kulturā aktivūs ļaužu, interesentu i atbaļsteituoju sasatikšona i īsadvasmuošonys pasuokums. Bolvys “Boņuks 2023” padūšonys ceremoneja[...]
21:15 Latgalīšu kulturys goda bolva “B... @ LTV1
Latgalīšu kulturys goda bolva “B... @ LTV1
Mar 2 @ 21:15 – 23:15
Kotru godu Latgalīšu kulturys goda bolvys “Boņuks” padūšonys ceremoneja ir na tik atsavieršona iz pārnajā godā padareitū, tok ari latgalīšu kulturā aktivūs ļaužu, interesentu i atbaļsteituoju sasatikšona i īsadvasmuošonys pasuokums. Bolvys “Boņuks 2023” padūšonys ceremoneja[...]
23:15 Kina “Cylvāka bārns” @ LTV1
Kina “Cylvāka bārns” @ LTV1
Mar 2 @ 23:15 – Mar 3 @ 01:00
Tei ir pyrmuo latgalīšu kina – Latgolā (Sakstagolā) filmāta i pošu latgalīšu spākim veiduota. Kina ir baļsteita iz Juoņa Klīdzēja romana ar taidu pošu nūsaukumu motivim. Stuosts par Latgolys Paulānu saimis dzeivi, par tradicejom i[...]