Storp bolvys “Kilograms kultūras” pretendentim stuostu kruojums “Dzeiveiba”

Storp bolvys “Kilograms kultūras” pretendentim stuostu kruojums “Dzeiveiba”

Dzeiveiba_1_vuoksSuocīs Latvejis Televizejis i Latvejis Radejis goda bolvys “Kilograms kultūras” caturtuo caturkšņa bolsuojums par spylgtuokajom kulturys nūtikšonom 2014. goda oktobrī, novembrī i decembrī. Storp nominantim literaturys i gruomotnīceibys kategorejā ir ari Ilzis Spergys stuostu kruojums “Dzeiveiba”. Stuostu kruojumā apkūpuoti deveni da šam napublicāti ci škārsteiklā fragmentari publicāti stuosti myusdīnu latgalīšu rokstu volūdā.

Nasaverūt iz tū, ka gruomotā apkūpuotī stuosti ci jūs fragmenti škārsteiklā da šam ir bejuši gryuši atrūnami i pīejami tik zynuotuojim, jī vairuok reižu ir atzeiti par lobuokū latgalīšu prozu i sajāmuši Latgalīšu kulturys goda balvu “Boņuks”: “Stuosts par suneiti” – 2008. godā, “Kopu svātki” – 2010. godā, “Puika mežā” – 2012. godā.

Kai atzeist Ilze Sperga: “Munu tekstu deļ babys ir klīgušys bazneicā i čut ni atsasacejušys nu „Katōļu Dzeivis” abonementa. Cytys ir smiejušuos da osoru, cytys rauduojušys nu dusmis. Tai ka sova auditoreja ir veiksmeigi atrosta. Tai kai rokstu es sev, varu raksteit sevkurā volūdā. I sev es rokstu latgaliski. Tei ir breiveiba sasaceņst ar sevi i sovu volūdys izjiutu.”

Bolvys “Kilograms kultūras” pādejuo caturkšņa bolsuojums nūsaslēgs 18. janvara pušnaktī. Bolsuot var ite.

Print Friendly, PDF & Email

Nūtikšonu kalendars