Kina “Segvārds Vientulis” Vuorkovys nūvodā tiks izruodeita 16. janvarī – IAC “Vanagi” telpuos četruos stuņdēs piec pušdīņu i Vuorkovys tautys nomā sešuos stuņdēs vokora. Īeeja bezmoksys.

Kinys centrā ir prīstera Ontona Juhņeviča īškejais konflikts storp gareidznīka morali ētiskajim pastatejumim i patriotisma jiutom, kas līk jimt rūkā īrūci, lai aizstuovātu Tāvzemi i Bazneicu laikā, kod Latgolā atsagrīž padūmu okupacejis režims.

Vonogūs Ontona Juhņeviča vuords nu cylvāku atmiņu nav pagaiss – par tū līcynoj pīminis pluoksne pi Vonogu bazneicys sīnys, nūruode iz tū Vonogu centrā, ekspoziceja Vonogu pamatškolys muzejā, pīmineklis Augšmuktūs Latvejis breiveibys idejis aizstuovim piec Ūtruo pasauļa kara – Latvejis Tāvzemis sorgu (partizanu) apvīneibys izveiduotuojim, vadeituojim i īdvasmuotuojim.

Kinys scenarejs tops sadarbeibā ar viesturnīkim Juoni Viļumu, Inesi Dreimani i Ritvaru Jansonu. Kinā tāloj profesionali akteri – Vairis Piņķis, Vilis Daudziņš, Ieva Aniņa i cyti. Kinā dzierdama ari latgalīšu volūda.