Da 2015. goda 13. februara J. Soikana Ludzys muokslys školā apsaverama Imanta Urtāna fotoizstuode. Kūpā izstateiti 12 dorbi, kas veļteiti aizvadeitajam zyrga godam.

Par sevi Imants soka: „Asu dzims 1960. goda 6.oktobrī Kuorsovā. Da 10. klasei bierneibu pavadeju Ludzā. Fotografiešona patykuse jau nu mozu dīnu, bet nūpītnai itai nūdarbei asu dasagivs pādejūs desmit godus. Fotografiešona nav ni pamatdorbs i nav ari vīnkuorši ūtruo profeseja. Tei ir dzeivis veids. Tys ir sviežņuoks pasauļa redzīns. Maņ ir veiksmeiga sadarbeiba ar laikrokstim „Laiks”i „Brīvā Latvija”, kurū skaiteituoji ir tautīši uorzemēs. Tī teik publicātys munys fotografejis, kas stuosta par nūtykumim Latvejā, par interesantim i pazeistamim cylvākim. Laikroksta redakcejai ir ari gruomotu izdevnīceiba, kas ir devuse īspieju pīsadaleit gruomotu ilustriešonā. Veiksmeiga sadarbeiba ir bejuse ar Latvejis Nacionalū teatri. Eipaši ļusteigajuos V. Lūreņa izruodēs „Latgola.lv” i „Latgola.lv-2”. Izruožu scenografejuos izmontuotys munys fotografejis, kas paruoda Latgolys laukus i akterus lūmom atbylstūšā vidē.”

Imanta Urtāna fotografejis ir nūvārtātys ari storptautyskūs konkursūs:
2010.godā „Trierenberg Super Circuit 2010” Lincā (Austreja) – 2 zalta medalis;
2011. godā „Baltic Wedding and Portrait Photograph 2011” – 1. vīta kategorejā „Kuozu reportaža”, 2. vīta kategorejā „Dzeivinīki”;
2011. godā „International Salon of Photography „Animals” Novi Sad (Serbija) – sudobra medaļa.