Vareiba īpazeit Latgolys tematiskūs cīmus izstuodē “Balttour 2015”

Vareiba īpazeit Latgolys tematiskūs cīmus izstuodē “Balttour 2015”

Turisma izstuodē “Balttour 2015” nu 6. februara da 8. februara ceļuošonys meiļuotuoji i cyti interesenti ir aicynuoti īsapazeit ar 35 Latgolys tematiskajim cīmim, kuri puorsteigs ar sovu kruosaineibu i daudzveideibu. Sateic tematiskū cīmu saimineicys, īsadvesmojūt ceļuojumam, klausīs aizraujūšus stuostus i latgalīšu muzyku, pīsadoli konkursā i teic iz Latgolu!

SONY-DSC22. storptautiskuos turisma izstuodis-godatiergs “Balttour 2015” tematiskajā hallē “Apceļoj Latveju!” byus vareiba īsapazeit ar vysu Latvejis regionu turisma pīduovuojumim. Eipaši interesanta apmaklātuojim byus gasteišona Latgolys stendā – tī varēs na tik satikt Latgolys omotnīkus i sātys ražuotuojus, nu ari īpazeit tematiskūs cīmus, par kurim poši latgalīši soka: “kotrs cīms ir kai kruosains dzeipurs komulī”. Tematiskī cīmi ir palykuši par unikalu turisma produktu, partū ka ir naatkuortuojami ar sovu naparostū sovdabeibu, pīduovuojumu gammu i kvalitati.

Latgolys tematiskī cīmi ir Latvejis i Lītovys puorrūbežu sadarbeibys projekts, kurā itūšaļt veiksmeigi dorbojās jau 35 cīmi. Kotrs cīms ir naatkuortojams i eipašs – cyts leluoks, cyts mozuoks, nu vysi kūpā skaisti!

Tierga cīma vadeituoja Aina Borsukova izstuodis apmaklātuojus īpazeistynuos ar cīma pīduovuojumu – vareibu Boltuos damys pavadeibā dūtīs pastaigā pa Malnovys muižys parku, izzynuot muižys viesturi laiku lūkūs, kai ari pīsadaleit maizis degustacejā voi paraudzeit sovys prasmis peirāgu i tortu cepšonā. Sovukuort Vija Kudeņa apmaklātuojus aicynuos iz Gūdu saimineicu cīmu, kur gostus cīnoj ar molkys plitā voi maizis kruosnī gataveitim latgalīšu iedīnim, kur saimineicys stuosta stuostus par latgaliskū kukni i iedīnim gūdūs i kasdīnā.

Nuokūtnis ūzulu cīms aicynoj sevkuru, kurs gryb izbaudeit Latgolys lauku skaistumu, pīsadaleit ūzulu alejis stateišonā i iepazeit ūzula dzeivi nu ūzulzeilis da vareiga kūka. Cīma vadeituoja Zane Praņevska izstuodis apmaklātuojim atkluos ari cytys ito cīma pīduovuotuos vareibys – kuozu svineibys ar latgaļu izdareibom, gūda vuortim, zyrga pajiugu, latgaļu dzīsmem i, prūtams, ar latgalīšu iedīnim i dzierīnim, godskuortu svātku svieteišonu i vysaidus cytus pasuokumus.

Cīši īcīneits turisma golamierkis ir Zyrgu cīms Kruoslovys nūvodā. Tys apvīnoj vairuokys zyrgu saimisteibys i dūd vareibu apsavērt i sporta zyrgus i rikšuotuojus, i Latvejis, Lītovys i Boltkrīvejis šķirņu zyrgus, kurus izmontoj turismam, gūdim, šovim i reitterapejai.

Aglyunys pusē, Cireiša dobys parka teritorejā atsarūn Upeņu sīra cīms, kur nu bioloģiskajā saimisteibā ražuotuo pīna tūp vysaidi sīri: sīrs ar upenem, meža sienem, sāklom, zaļumim, aprikozem i rozīnem. Cīma vadeituoja Inese Survilo izstuodē na tik pastuosteis par sīru daudzveideibu, nu ari par upeņu procedurom malnajā piertī. Sovukuort Kotleru veina cīma vadeituoja Irēna Koleda aicynuos iz Preiļu nūvodu baudeit vysaidus sātys veinus, sulys, īvuorejumus i breinumgordus marmeladus nu pošaudzātu ūgy.

Īprīkš pīmynātī cīmi ir tik moza daļa nu vysa leluo Latgolys tematiskūs cīmu pīduovuojuma. Cīmūs ir atrūnami ari piertnīku pakolpuojumi, mads, zuoļu čajs, ekologiski audzāti augli i duorzini, garšaugi i garšvīlys, vysaidi stuodi, teik pīduovuotys ekskursejis i degustacejis, meistardarbneicys i paraugdemonstriejumi, vysaidi maršruti i pastaigu stygys, rūkdorbi, atrakcejis i puosoku tāli, meža lobumi, latgalīšu daņči, dzīsmis, rūtalis i stuosti, atpyuta pi dobys, zveja i vēļ daudz kuo cyta.

Karteņā: Brančs Tierga cīmā Malnovā 2014. goda vosorā

Print Friendly, PDF & Email

Kalenders

Mar
30
Sai
15:00 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 30 @ 15:00 – 16:30
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
Mar
31
Svā
all-day Izstuode “Latgales keramikas stā... @ Daugovpiļs Muola muokslys centrs
Izstuode “Latgales keramikas stā... @ Daugovpiļs Muola muokslys centrs
Mar 31 all-day
Da 31. marta Daugovpiļs Muola muokslys centra izstuožu zālē apsaverama Tautys lītiškuos muokslys studejis “Latgale” izstuode “Latgales keramikas stāsti”, kurā apkūpuoti studejis lobuokī dorbi, viestej informaceja Daugovpiļs piļsātys sātyslopā. “Kotrys dorbs sovā byuteibā ir unikals i naatkuortojams, kotram[...]