Piec diveju nedeļu ilguša tautys bolsuojuma “Alternative.lv Goda bolvā” izvierzeiti nominanti pīcuos kategorejuos. Par Goda albumu titulu sasacenš ari latgalīšu grupa “Green Novice” ar albumu “Padebeši”.

Nominacejā Goda albums izvierzeiti: Green Novice (albums “Padebeši”), Ansamblis Manta (“Manta”), Audrey Fall (“Mitau”), Ghettozloba (“Pamats Sirdsmieram”), kai ari Wagars (“Sidrabenes lāsts”).

Ar cytom nominacejom var īsapazeit ite.

Pyrmū reizi bolvu sadalejumu nūsaceis i klauseituoji, i žūreja, kurys sastuovā ir Dambis nu grupys “Inokentijs Mārpls”, Uldis Rudaks, Deniss Denisenko, Juoņs Jansons, Edgars Uobuļeņš, kai ari portala “Alternative.lv” puorstuovi.

Bolvu padūšona nūtiks 6. februarī klubā “Nabaklab” ar grupu “F[ei]K”, “Sanctimony” i “iLLa” daleibu.

Portals “Alternative.lv” darbeibu suocs 2000. godā, kod, pīaugūt Latvejis naatkareiguos muzykys kusteibai, tys palyka par informativu platformu hardcore/punk/ska scenai. Piec sliegšonys 2007. godā, tys ar jaunu sporu atsuoce darbeibu 2012. godā par vīnu nu kasgadejom tradicejom uzturūt goda bolvys padūšonu.