Sevkurs interesents i foto muokslys cīneituojs ir gaideits Rēzeknis nūvoda pošvaļdeibā, kur da februāra beigu var apsavērt fotokluba “ARTērija” bīdru i jūs draugu veiduotū izstuodi “Dorbs”.

Kai pastuosteja vīns nu izstuodis leidzautoru, fotokluba “ARTērija” bīdrs Eduards Medvedevs, ideja reikuot fotografeju izstuodi par cylvākim dorba procesā rodusēs, partū ka taišni dorbs ir tys, kas raksturoj i pylnveidoj cylvākus. “Eipaši Latgolā cīši bīži var likt vīnuodeibys zeimi storp vuordim “dorbs” i “omots”, partū ka ite cylvāki nu paaudzis paaudzē puormontoj prasmis i orūdus, kū lītoj ari kasdīnā, nūdrūšynojūt sev iztyku.”

Par izstuodis simbolu var saukt sastruoduotys rūkys, kas līcynoj par gryutā dorbā pavadeitu dzeivi, sovukuort fotografim tei ir kai mada maize: “Rūkys, leidzeigi kai acs, par cylvāku pasoka cīši daudz. Tuos vysod ir interesanti fotografēt, i ari rezultats kotru reizi ir puorsteidzūšs,” soka Eduards Medvedevs.

Izstuodē apsaveramū fotografeju autori ir fotokluba bīdri: Eduards Medvedevs, Ivars Dauguļs, Edgars Pavlovskis, Mihails Stecjuks, Sanda Medvedeva, kai ari fotokluba draugi: Māris Justs, Jurs Laizāns, Anna Rancāne i Viola Anna Bīriņa.

Informacejis olūts: rezeknesnovads.lv