Daugovpiļs Latvīšu kulturys centrs i folklorys kūpa “Svātra” pavasara gaideišonys svātkūs – Aizgavienī – suoc jaunu pasuokumu cyklu “Vakariešona ar Svātru”, kurā, kūpā dorbojūtīs, kotrs sev var raudzeit atkluot latvīšu folklorys byuteibu, gudreibu i spāku.  12. februarī 18.30 Latvīšu kulturys centra kopejneicā (Reigys īlā 22a, Daugovpilī) teik reikuoti “Aizgavieņa daņči”.

Pasuokuma pyrmajā daļā vysi teik aicynuoti iz energetiski stypru tautysdzīšmu kūpdzīduošonu. Itaidys tautysdzīsmis ir meditativs goreiguo spāka olūts. Tuos paleidz sakuortuot i harmonizēt sovu īškšejū pasauli. Tautysdzīsmis tiks skandātys kūklis pavadejumā, partū ka taišni kūklis radeitajom skaņom pīmeit spieja dzydrynuot gaisu i energetiski atteireit vidi. Kūpdzīduošonys laikā sevkurs leidzadzīduotuojs tiks pi pateikamys mīra sajiutys, sajims spāku kasdīnys gaitom i vokora daņčim.

Pasuokuma ūtrajā daļā sevkurs varēs īsasaisteit dejuos i rūtaļuos. Kai jau kuorteigā Aizgavienī byus ari “Blīni”, nu itūreiz tuos tiks pīduovuotys na captys, nu doncuojamys. Folklorys dejom nav vajadzeigys prīškzynuošonys, speciala sagatavuoteiba. Ir vajadzeiga gribiešona pīsadaleit i ārta apave. Muzykanti, kas muok spielēt tautys muzykys instrumentus, teik aicynoti pīsavīnuot kūpeigai muziciešonai dejuos i rūtaļuos. Teik planavuots, ka tautysdzīšmu kūpdzīduošona i sadoncuošona paliks par tradiceju, i jau pavasarī nūtiks vēļ itaida veida pasuokums.