Jau itūsvātdiņ, 22. februarī 16.00 Latgolys viestnīceibys GORS Lelajā zalā byus svineiga Latgalīšu kulturys goda bolvys “Boņuks 2014” bolvu padūšonys ceremoneja, kurā tiks gūdynuotys nūtikšonys, ļauds, aktivitatis, kas latgalīšu kulturā bejuši nūzeimeigi 2014. godā. Latvejis Izpiļdeituoju i producentu apvīneiba (LaIPA) nūsaukuse nominantus kategorejā “Radejis hits”.

Latvejis Izpiļdeituoju i Producentu apvīneiba (LaiPA), apkūpojūt vysmoz treis radeju stacejuos pārņ vysvaira atskaņuotuos latgalīšu dzīsmis (dzīsmis publicātys suocūt ar 2013. goda 1. decembri), ir nūsacejuse treis pretendentus iz bolvu nominacejā “Radejis hits”:

• Bez PVN – “Loopi”

• Borowa MC – “Eņgeļs”

• DabasuDurovys – “Kur golam gols”

“Latgalīšu kultura i volūda naapšaubomi ir vīna nu leluokūs Latvejis boguoteibu, deļtuo mums ir lela prīca, ka kas gods teik izcalti tī ļauds, kas paleidziejuši veicynuot itū boguoteibu saglobuošonu i atteisteibu. LaIPA ir pagūdynuota ar īspieju izvērtēt i nūsaceit nominantus i ari uzvarātuoju kategorejā “Radejis hits”,” nūruoda LaIPA izpylddirektore Liena Grīna.

Svineiguo ceremoneja svātdiņ tiks aizsuokta ar izvadumu “Francis”, kas veļteits īvārojamajam vaļstsveiram Fraņčam Trasunam. Pasuocīņa ūtrajā daļā kulturys sferys puorstuovus gūdynuos nominacejuos “Goda cylvāks kulturā”, “Goda nūtikšona”, “Par latgalīšu volūdys populariziešonu”, “Goda amatnīks/saiminīks”, “Goda snāgums vizualajā muokslā”, “Goda snāgums skotuvis muokslā”, “Lobuokais snāgums pop/rock muzykā”, “Lobuokais snāgums tautys muzykā”, “Lobuokais snāgums alternativajā muzykā”, “Lobuokais snāgums akademiskajā muzykā”, “Lobuokais muzykys video”, “Goda debeja muzykā”, “Lobuokais snāgums šlagermuzykā”, “Lobuokais snāgums literaturā”, “Lobuokais izdavums/gruomota”, “Radejis hits” i “Par myuža īguļdejumu latgalīšu kulturys atteisteibā”.

Latgalīšu kulturys goda bolvys “Boņuks” mierkis ir veicynuot latgalīšu kulturvidis saglobuošonu i atteisteibu, kai ari apkūpuot i gūdynuot spylgtuokūs i nūzeimeiguokūs sasnāgumus latgalīšu kulturā pārnejuo goda grīzumā. Bolvys nūtikšonu atbolsta Vaļsts Kulturkapitala fonds, AS “Latvijas Valsts meži”, Rēzeknis piļsātys dūme, Rēzeknis nūvoda dūme, Dagdys, Ludzys, Bolvu, Kuorsovys, Kruoslovys, Preiļu, Rībeņu, Vileks, Ruguoju i Baļtinovys nūvodu pošvaļdeibys.