21. februara vokorā tyka padūtys Latvejis Televizejis i Latvejis Radejis kulturys goda bolva “Kilograms kultūras”. Literaturys i gruomotnīceibys sadaļā skaiteituoji par lobuokū atzynuši Ingys Ābelis romanu “Klūgu mūks”.

Ingys Ābelis romans “Klūgu mūks” ir stuosts par pyrmūs Latgolys latvīšu bazneickungu i liduotuoju dabasu olkom, par cylvāka sirds i sapruota celim, par grāku i pīdūšonu. Golvonuo varūņa prototips ir Fraņcs Trasuns – katuoļu prīsters, teologejis magistrs, īvāruojams vaļstsveirs i sabīdrisks darbinīks, kam 2014. godā byutu palykuši 150 godu.

“Kilograms kultūras” tyka padūts 7 nominacejuos, kai ari pīškierta žūrejis specialbolva. Bolvys pretendentus nūsaceja žūreja, kurys sastuovā beja Latvejis Televizejis i Latvejis Radejis žurnalisti, nu uzvarātuojus nūsaceja skateituoju bolsuojums.

Muzykys kategorejā bolvu sajēme koncerts “Dzymuši Reigā”, kino – kina “Modris”, teatrī – izruode “Visas viņas grāmatas”, vizualajā muokslā – pyrmuo pasauļa kara symtgadei veļteituo izstuode “1914”. Par goda kulturys nūtikšona tyka atzeita 8. Pasauļa koru olimpiade, nu par goda puorsteigumu – kamermuzykys festivals “Sansusī”. Žurejis specialbolvu sajēme “Reiga 2014” tematiskuos linejis “Brīvības iela” kurators Gints Grūbe i projekts “Stūra māja”.