Ludzā teik radeita Vulfa i Herca Franku dorbu multimedialuo ekspoziceja

Ludzā teik radeita Vulfa i Herca Franku dorbu multimedialuo ekspoziceja

Ludzys nūvodā teik vuokti i kruoti zynomuokuo Ludzys fotografa, rodūšuo meistara Vulfa Franka i juo dāla, pasauļslavonuo kinodokumentalista Herca Franka dzeivis, saimis, rodūšuo dorba materiali.

Ir savuoktys na tik līceibys par personeibu veiduošonūs, saimi, draugim, vuiceibom, nūsadorbuošonu, 19.-20. godu symtu mejis Ludzys sabīdreibu i dzeivi, politiskim i kulturviesturiskim aspektim, nu ari īskots jūs rodūšajā dorbā: Vulfa Franka dorbu foto reprodukcejis, plakati, mieginuojumi izveiduot kinu. Sovūs dorbūs fotografs ir īmyužynuojs ainys par Ludzys viesturi 19.-20. godu symtu mejā – ar tuos sovdabeigū kūka apbyuvi, sabīdreibu i lelū Ludzys guņsgrāku 1938. godā. 19.-20. gs. mejā Ludza beja ūtruo leluokuo ekonomiski atteisteituo piļsāta Latgolā aiz Daugovpiļs. Muokslinīks ir atstuojs spylgtys līceibys par itū laiku, par personeibom, kurys ir juosagloboj i juoparuoda myusu dīnu dzeivuotuojim.

Rodūšū dzierksti nu tāva montuojs dāls – Hercs Franks, dzims ludzuonīts. Hercs Franks bejs izcils meistars, kas prats uzrunuot skateituoju vystīšuok, kas nu nakusteiga foto ir aizguojs da kino, pīpyldūt tāva sapynu, atrūnūt atbylstūšus izteiksmis leidzekļus, vuicejs Latvejis i cytu vaļstu jaunūs kinodokumentalistus, sajiems naskaitamys storptautiskys atzineibys. Juo muokslys kūduls vaicuojams juo kinuos, tāva fotografa orūdā i bierneibys piļsātā Ludzā. Unikals materials ir Herca Franka dorbi, kurūs var sajimt spylgtu emocionalu īspaidu nu dzili filozofiskuos režisora pīejis dokumentalajam kino i realuos dzeivis atspīgeļuojumam iz ekrana, kurus vyslobuok ir vērtīs kotram individuali. Vysys Franka radeituos kinys nas sevī dzeivis jāgys vaicuošonys dūmu, partū tuos mudynoj puordūmom par sevis i apleicamuos vidis sakuortuošonu, nas sevī audzynūšu momentu, kas pozitivi ītekmej i mudynoj cylvākus maineitīs iz lobuokū pusi.

Kab dzeivuotuojim tyktu radeita vareiba īsapazeit ar 19.-20. gs Ludzu i fotografa Vulfa Franka i kinodokumentalista Herca Franka daiļradi i dzeivi, Ludzys nūvoda pošvaļdeiba eistynoj projektu “Vulfa Franka un Herca Franka darbu multimediālās ekspozīcijas aprīkojuma iegāde” ar Eiropys Lauksaimisteibys fonda lauku atteisteibai Lauku atteisteibys programys pasuokuma “Lauku ekonomikas dažādošana un dzīves kvalitātes veicināšana vietējo attīstības stratēģiju īstenošanas teritorijā” atbolstu. Projekta ītvorūs tiks īguoduots apreikuojums i izstruoduota programmatura ekspozicejis atspīgeļuošonai. Itūšaļt nūteik dorbs pi programmaturys izstruodis i ekspozicejis materiala apkūpuošonys. Ekspoziceju plānuots atkluot majā Ludzys nūvodpietnīceibys muzejā.

Vaira par Hercu Franku var skaiteit ite.

Karteņa: lv.wikipedia.org

Print Friendly, PDF & Email

Nūtikšonu kalendars

There are no upcoming events.