26. aprelī 15.00 Dagdys nūvoda Tautys nomā nūtiks XII Golda dzīšmu i “gveļžu” saīts “Auni kōjas, laksteigola!”

Jau divpadsmytū godu pavasars līk sasarūseit dzīdūšajim kolektivim i stuostnīkim, kab otkon piec tymsuos zīmys sasatyktu Dagdys nūvoda Tautys nomā i izdzīduotu sovys sirds dzīsmis, kai ari pastuosteitu sovus lobuokūs stuostus. Itūreiz saīta tema ir : Puosokys, sokomvuordi i parunys – tautys dzeivis gudreibu atkluojieji.

Jau izaveidojuse tradiceja, ka pasuokums nūteik apreļa beiguos, kod jau atguojs pavasars ar dobys atmūdu, ar zylajom vizbuleitem, kurys kai pūdzenis speid pi zemis muotis bryungonūs bruņču, ar jaunū bierzeņu i lozdu zīdūšajom skorom i saulis apspeidātu ceļu, pa kuru saīt, sabrauc saīta dalinīki, kab pīpyldātu eistyn pavasareigū dīnu ar kūpā byušonys prīcu, smaltūs spāku vysam godam i daleitūs pīredzē. Ar vīnu vuordu sokūt – sasatyktu, sasapazeitu, sasadzīduotu i sasadraudzeitu.

Pasuokuma organizatori aicynoj sevkuru interesentu dzīduot i jūkuot kūpā ar jim.