Aprelī nūtiks Latgolys pūdnīku dīnys

Aprelī nūtiks Latgolys pūdnīku dīnys

Aprelī nūtiks tradicionaluos, nu jau 35. Latgolys pūdnīku dīnys. Vysvaira nūtikšonu paradzātys Rēzeknē, Rēzeknis nūvodā, kai ari Daugovpiļs Muola muokslys centrā.

Jau nu 9. apreļa da poša 24. maja Daugovpiļs Muola muokslys centrā byus apsaverama keramikys izstuode “Bestiārijs”, nu vysvaira nūtikšonu gaidomys apreļa ūtrajā pusē.

17. aprelī Nautrānu sporta hallē – kulturys nomā nūtiks Nautrānu pogosta puorvaļdis, Nautrānu vydsškolys i Jura Soikāna Ludzys muokslys školys Nautrānu filialis reikuotais Latgolys nūvodu bārnu interešu izgleiteibys vizualuos muokslys i keramikys puļceņu rodūšais konkurss “Netradicionālais svečturis”.

Daugovpiļs Muola muokslys centrā aktivitatis paradzātys nu 19. da 22. apreļa. 19. aprelī 17.00-21.00 tī tiks kūrts molkys ceplis, nu dīnu vāluok, 20. aprelī, 15 stuņdēs tys tiks attaiseits. Nu 22. aprelī nu 12.00 da 18.00 nūtiks Daugovpiļs Muola muokslys centra attaiseitūs durovu dīna.

23. aprelī attaiseitū durovu dīnys paradzātys i Olgys i Valda Pauleņu keramikys darbneicā Kruoslovā, i Olgys, Voldemāra, Juoņa i Māra Vogulu darbneicā “Voguly” Rēzeknis nūvoda Lendžu pogostā. Tuos pošys dīnys vokorpusē pi Rēzeknis piļskolna tyks kūrts reducātuos keramikys ceplis.

24. apreļa reitā tiks attaiseits īprīkšejā dīnā Rēzeknē kūrtais ceplis, taipat vysys dīnys garumā byus attaiseitūs durovu dīna Rēzeknis Muokslys i dizaina vydsškolā.
Nu 12.00 da 16.00 Latgolys Kulturviesturis muzejā nūtiks kulturizgleitojūšs seminars, kura programā paradzāta: Latvejis Nacionaluo kulturys centra DVD “Satiec savu meistaru! Nr.2. Latgale” prezentaceja, referati par Latgolys keramiku, kai ari diskuseja par Juoni Pujatu.
Dīna tiks nūslāgta Vēsmys i Aivara Ušpeļu darbneicā “Malny Vylky” Maltys pogostā, kur tiks kūrts ceplis. Apmaklātuojim byus vareiba ari pošim paraudzeit muola trauku lepeišonu ar rūkom, degustēt “Latgolys golda” dietiskū špeku, redzēt guņs skulpturys i īsajust vydslaikūs, īsasaistūt viesturis rekonstrukcejis kluba “Kroma kolna bruoliste” prīšknasumūs.

25. apreļa reits suoksīs ar cepļa attaiseišonu darbneicā “Malny Vylky”. Piec tam vysi teik aicynuoti iz Latgolys pūdnīku dīnu izstuodis atkluošonu Lūznovys muižā, kas itūgod piec rekonstrukcejis otkon tykuse pi sova senejuo kruošņuma. Keramikys izstuodē Latgolys pūdnīceibys meistari pīduovuos apsavērt niansem boguotū reducātū i glazātū keramiku vysaiduos formuos, kruosuos i pīlītuojumūs. Izstuodi papyldynuos gleznuotuoju apvīneibys “V.I.V.A.” i Gundegys Rancānis gleznys, Riharda Cybļa rūtyslītys, kai ari fotokluba “ARTērija” bīdru muokslinīciskuos fotografejis.

Print Friendly, PDF & Email

Nūtikšonu kalendars