LgSC eistynoj projektu par Latgolys jaunīšu drūšumspieju i pylsūniskumu

LgSC eistynoj projektu par Latgolys jaunīšu drūšumspieju i pylsūniskumu

LgSCJaunīšu bīdreiba “Latgolys Studentu centrs” ar Dīnvydlatgolys NVO atbolsta centra i Kulturys ministrejis atbolstu nu februara da majam realizej iniciativu projektu „Latgales jauniešu drošumspēja un pilsoniskums”. Projekta laikā tiks organizātys apvuiceibys par piļsūniskuma prasmem i drūšumspieju, eistynuotys jaunīšu iniciativys i taiseiti interesanti video ar dalinīku redzīnim i padareitajim dorbim.

Projekta ideja ir rodusēs bīdreibys jaunīšim i Daugovpiļs Universitatis studentim. Projekta mierkis ir veicynuot jaunīšu drūšumspieju, sekmejūt Latgolys regionā iniciativys i jaunīšu piļsūniskū leidzdaleibu. Projekta aizdavumi ir veiduot izpratni jaunīšim par drūšumspieju i piļsūniskū leidzdaleibu/aktivitati, izgleitojūt par īspiejom i napīcīšameibu pilnveiduot pilsūniskumu i iniciativys, snīgt atbolstu jaunīšu iniciativom, pylnveidojūt personiskū drūšumspieju i īdvesmojūt cytus byut atbiļdeiguokim i aktivuokim sovā kūpīnā.

Projektā ir aicynuoti pīsadaleit jaunīši nu 16 da 25 godu vacumam. Apvuiceibys nūtiks martā trejuos piļsātuos: Daugovpilī, Rēzeknē i Dagdā. Apvuiceibu temys: drūšumspieja i personiskuo atbiļdeiba; drūšeiba i uzjiemeiba; pašpuorvaļde, parlaments – muns izaicynuojums i leidzdaleiba vītejā kūpīnā; sadarbeibys i vadeibys prasmis. Piec daleibys apvuiceibuos kotrai jaunīšu grupai byus juoeistynoj vysmoz vīna iniciativa sovā piļsātā/školā ci jaunīšu centrā. Projekta laikā tiks sataiseita ari interesanta videosereja, kas tiks prezentāta projekta beigu pūsmā kotrā nu aktivitašu vītom. Aktivitatem var sekuot leidza projekta lopā socialajā teiklā facebook.com.

Lai dasasaceitu apvuiceibom ci izzynuotu vaira informacejis par projekta aktivitatem, lyudzam sasazynuot ar organizatorim, zvonūt pa telefonu – 28362243 (Dagnija) ci rokstūt iz e-postu daugavpils@lgsc.lv. Projekta kontaktpersona Daugovpilī – Alīna Ivanova (e-posts: alivka.ivanova@gmail.com), Rēzeknē – Lolita Kivleniece-Kuzņecova (e-posts: san@ru.lv), Dagdā – Aina Odiņeca (e-posts: bjcdagda@inbox.lv). Projekta sadarbeibys partneri ir jaunīšu bīdreiba „Dagne”, bīdreiba “Darītājiem” i Rēzeknis Augstškolys absolventu asociaceja. Projekta aktivitatis tiks eistynuotys sasadorbojūt ar Daugovpiļs Universitatis Karjerys i iniciativu atbolsta centru, Rēzeknis Augstškolu i c.

Bīdreiba “Latgolys Studentu centrs” dorbojās jau gondreiž desmit godu i sovā darbeibys laikā ir radejusi lelu sadarbeibys teiklu ar vysaidom Latgolys organizacejom. LgSC aktivi īsasaista Latgolys regiona kulturys i socialajā dzeivē i aicynoj tū dareit ari Latgolys jaunīšus.

Viesti sagataveja: Dagneja Bramane, LgSC

Print Friendly, PDF & Email