***
Ontonu pi muzeja
bučoj i skaun
jaunekleigys meitinis.
Drusku par jaunu
i reizē tymā
par vacu,
kab saprostu
tū
nikod naskaiteitū
latgalīšu dzeju i ailis.
Čmok, čmok!
Saplesnej zivs atmiņa
fotoklikša attuolumā.

***
Piec puora godu
Zīdūņa mežs īīs piļsātā.
Paliks viņ īriedni
ar sovom kopeja pauzem.
Templi rozcalti
bez bārnu smīklim.
Viļteigais Varšovys prīkšpiļsātys palākums
teik cyldynuots centra vydā.
Draugs,
ka īmessi paceņu rauga
atejā,
gaisā
var uzliduot pussāta.

***
Muni besi
beidzūt
nūmīrāti,
pabaruoti.
Niu šņuokuļoj pa gultom.
Meitinis sovu izturēja,
vaira napraseja nikuo.
Viņ puors
capumu graudā.
Jom pītyka.
Pošys pazīduoja
boltu i nateiru
sovu
pyrmū pyrmatneibu.
– Kai nivīnā acī! –
Aizbļaun vīns nu jim.
Es raužu,
jo jī nav saprotuši nikuo.
Bet soku jam
– Ka vēļ vīnu reizi
izarunuosi,
viļkšu tevi
iz Kovšu sleicynuot!
Kai nazkod
Kemps aizvylka Trasunu! –

***
Īsazūg rudiņs
nuosīs i kruosuos.
Knybynojūs ap casnāgim
klāva driebēs.
Runtortys dačuos
bārnāki veļ jūprūjom
sprausloj i spūrkš
Apleicīnei puori.
Ar sorkonim ritinim sovim.
Moza i glupa
augustā prīca
nūrauduot par gondreiž
nūguojušu vosoru.
Pusnakts urālu zāni,
maršejūt admirāļu jiuzuos,
steidz sadaleit buobys
i rajona rūbežys
iz nuokamū sezonu.
Tai siedim
divatā ar kači.
Veromēs
iz gryusnajom cārmūškom
i runojam ar Dīveņu
– Cik ta molkys vajadzēs iz zīmu? –
A vystu
apēssim nu reita.
Kod Anna
ar ritini atbrauks.

***
Nasamat mēle
aiz pyrmajim burtim.
Gruomotys izdūmoj,
ka vīgļuok dzeivuot
byus bez vuoku.
Tok tei beja klaida.
Klaida
naproskaiteit īsuoktuos da gola.
Niu juos sajukušys
puslopu numeracejuos,
alfabeta mežūs dzili.
Laime beja tik tiuli,
tiuli.
Viņ pītryuka uzmaneibys,
drūsmis.
Mozys saujis pļovys smīklu.
I nivīns tod napalyktu
Duraks pyrma smierts.

***
Es aizguoju ar sirdi.
Tu smiejīs
I vuorieji studini.
Tu aizguoji bez sirds.
Iz veikalu
iz tiergu
iz paguojušū sātu.
Sagribieji i nūrauduoji tīpat.
Apleik
cyuku zornys i
attaiseitys kompetu kastis.
Nūkolieji obejus.
Saplāstuos dūmuos,
runuoji nasaprūtami krīviski
par Hemingveju.
Tev niule sekcejā
ir izvirpuots kino
i kūka dūbumā
paslāpts televizors.

***
Ap reitu
meitine atguoja
sapynā munā.
Jauna i šmuka.
Ar saulisrīta smaidu
dabasu teirumā.
Kai nikod nabejuse
dzeivē munā.
Dasalīce
i nūžvūržnēja,
nūdzīduoja
maņ šyupļadzīsmi
pi šyupeļa boltuo.
Klusā
nūmūda bolsā.
Pasacieļs nūbrauču
da Viļakys tierga.
I verīs,
tī jei guļ
vīglā pohmeleitī
iz autoūstys jumta.
Zalta kompetys
čygonim buorsta.

***
Atsarūnūt bezlaika telpā,
suoku runuot ar ausim.
Piecpušdīnē
gribieju atslēgt gaisu,
viņ nazynuoju
precizi, cikūs.
Gaisma beidzēs,
dzīsmi dzīžūt.
Vīneiguos atminis atrodu
nu juļa.
Kod bazneickungs vēme
nu kuozu.

***
Okupēsim
vasarneicys goldu
divatā viņ.
Nūrausim jam
voskadrānu nūst.
Tod izspēlēsim vysys
zynomuos i nazynomuos
golda spēlis.
Kuorteigi i plyki.