Reigā 14. martā nūtyka kasgadejuo „Latgolys Studentu centra” kūpsapuļce, kurā atsavērem iz padareitū īprīkšejā dorba cielīnī i raudziejam saprast, kaidim byut iz prīkšu. Kai ari tyka īvālāta jauna vaļde.

Aizvadeitajā godā ir eistynuoti vairuoki projekti, ar kurim asam davuši pīnasumu Latgolys kulturys izaugsmē i saglobuošonā. Padareitī dorbi gondreiž 10 oficialuos darbeibys godūs aplīcynoj, ka LgSC ir vīna nu spieceiguokajom i stabyluokajom latgalīšu organizacejom.

Piec kuorteiga dorba kūpā asam atsapyutuši i kaldynuojuši jaunys idejis, kab Latgolu caltu sauleitē. Nu nūzeimeiguokajim eistynuotajim projektim mynoms dzejūļu kruojums „mūžīgā nepārtikusī stirna”, apvuiceibys „Atzolys”, naformaluos sporta spielis “Na-Formals”, Latgalīšu kulturys ziņu portals lakuga.lv, latgalīšu rokstu volūdys nūdarbeibys, kai ari cyti mozuoki i leluoki projekti.

Rēzeknis i Daugovpiļs birojim niu ir jaunys vadeituojis – rodūšys, dorbuotīs grybūšys i energejis pylnys mārgys. Daugovpiļs biroju voda Gunta Nagle, sovukuort Rēzeknis biroju – Sintija Batare.

Jaunuos vaļdis sastuovā dorbojās Laura Melne, Marita Lasmane, Vineta Vilcāne, Juoņs Papiņš i Valērijs Kušnirs, par vaļdis prīkšsādātuoju īvālāta Vineta Vilcāne.

Nūpītna kūpbiļde ar gondreiž vysim kūpsapuļcis dalinīkim.

Na tik nūpītna kūpbiļde.

Jaunuo vaļde – Marita, Juoņs, Laura, Vineta i Valērijs.