Cyblys nūvodā jau tradicionals palīk Styprūs skriejīņs – atraktivys saceņseibys breivā dobā, kas ītvar klasiskuo skrīšonys krosa, vysaidus veikleibys i spāka disciplinu elementus. Itūgod tys nūtiks 1. augustā Cyblys peintbola laukuma teritorejā. Interesentim jau ir vareiba dasasaceit saceņseibom.

Da 11.00 paradzāta dalinīku registraceja i sapuļce. Tod starts tiks dūts sīvītem, 13.00 – veirīšim, 15.00 – komandom. 18.00 paradzāta apbolvuošona.

Saceņseibu trasis garums ir 5 km, tamā atsarūn 35 dabeigi i ari muoksleigi veiduoti škieršli. Saceņseibu kontrollaiks – 2 stuņdis.

Daleibai saceņseibuos var dasasaceit sevkura persona, kura saceņseibu dīnā ir sasnāguse vysmoz 18 godu vacumu. Var startēt nu 16 godu vacuma, nu tik ar vacuoku rakstisku atļuovi. Sīvīšu i veirīšu grupuos dalinīki startej individuali. Komandu grupā – 3 cylvāku komanda, kurā juobyut puorstuovātim obejim dzymumim.

Saceņseibom var registrētīs pi tūs organizatora Alda Tihovska, rokstūt jam iz e-posta adresi aldons777@inbox.lv voi portalā draugiem.lv. Pīraksteit: Pīsadaleišu sīvīšu/veirīšu, individualajā/komandys skriejīnī Styprūs skriejīņs, Dalinīka vuords, pavuorde, kai ari dzimšonys gods. Dalinīkam personeigi juopasaroksta dasacejuma anketā saceņseibu dīnā, paruodūt personu aplīcynūšu dokumentu.

Registrejūtīs saceņseibom, dalinīkam treis dīnu laikā juopuorskaita daleibys moksa: individualajim dalinīkim – 7 eiro, komandom – 25 eiro. Ka dalinīks atsasoka nu skriejīņa da 16. juņa, daleibys moksa teik atmoksuota piļneibā, ka tū izdora da 20. juļa – moksa teik atmoksuota 50% apmārā.

Dasasaceit skriejīņam i samoksuot daleibys moksu varēs ari saceņseibu dīnā – 1. augustā.

Skriejīņa dalinīkam tiks pīškierts starta numers, piec kura tiks fiksāts juo rezultats trasē. Atseviški teik apbolvuoti pyrmūs treis vītu sajiemieji veirīšu, sīvīšu i komandu klasēs. Kotrs sekmeigi trasi veikušais dalinīks sajims pīminis suveniru. Byus ari specialbolvys vairuokuos nominacejuos.

Saceņseibu dīnys vokorā Cyblys Kopukolna estradē byus diskoteka.