Pavasars vysod īt ar trūksni: snīdzinis drūsai spraucās cauri vēļ piļneibā naatsylušajai zemis gorūzai, spruogst jaunī bārzu pumpuri, putyni trokoj pa gaisu sajiusmā par sauli, iudini šauduos pa upem kai atsabreivuojuši nu īslūdzejuma i ari Sovvaļnīks grudynoj zemi i cylvāku pruotus ar jaunū dzīsmi “Ceļš”.

Koč i muzykys ritmi suokumā ruodīs smognieji i rupi, jaunuo dzīsme ar latgalīšu dzejneicys Annys Rancānis dzeju ir par skaistū vysapleik, kas nikuo namoksoj, nu dūd dzilis i patīsys emocejis, par īškšejū breiveibu i spieju atsasaceit nu materialūs vierteibu i ari par eistu draudzeibu, kas ļaun daleitīs vysā i veidoj myužeigū dzeiveibys apli.

Muzykys autors – Sovvaļnīks, dzeja – Anna Rancāne.

Dzīsme ir īraksteita sadarbeibā ar Latvejā zynomajim skaņu režisorim Gintu Lundbergu i Gintu Stankeviču. Īrokstā pīsadola Sovvaļnīka grupys bīdri – Māris Lovniks (gitara), Artūrs Meļnikovs (bass) i Vadims Meļuščenkovs (bungys).