Da 3.maja Latgolys Centraluos bibliotekys Laseitovā apsaverama ceļojūšuo fotoizstuode “Latgolys bibliotekars – rodūšuma olūts”.

Izstuode ir radeita projekta “Latgolys regiona publiskūs biblioteku darbinīku konfereņce “Pi gaismys olūta veļdzietīs nuoc…”” ītvorūs. Projekts teik realizāts ar Latgolys regiona atteisteibys agenturys, Vaļsts Kulturkapitala fonda i A/S “Latvejis vaļsts meži” finansialu atbolstu.

Izstuodē īkļautī dorbi tyka atlaseiti konkursa kuorteibā. Latgolys regiona publiskuos bibliotekys aktivi atsasauce aicynuojumam i īsyuteja sovu fotografiskū skatejumu iz bibliotekara profesejis rodūšajom izpausmem. Izstuodē byus apsaverami vysaidu autoru dorbi, kas radeiti vairuokuos Latgolys bibliotekuos.

Izstuodis eipašuo vierteiba ir tuos dažaideiba, partū ka kotrs fotografs pīduovoj sovu individualū redziejumu par bibliotekara profeseju. Latgolys bibliotekari fotoizstuodē ir attāluoti i kasdīnys dorbā, i eipašuos svātku šaļtīs. Izstuodis aizdavums ir ceļt bibliotekaru pošapziņu, styprynuot profesionalū identitati i pīdereibys sajiutu, dūt pozitivys energejis luodeņu i īdvasmuot profesionalai izaugsmei. Tok izstuodis veiduotuoji cer, ka tei paleidzēs ari plašuokai sabīdreibai īraudzeit bibliotekaru kai rodūšu, goreigi pīpiļdeitu, īdvasmys boguotu kulturys darbinīku, kas sovus profesionalūs pīnuokumus veic ar aizrauteibu, sirds degsmi i naizseikstūšu optimismu.

Nu 2014. goda septembra ceļojūšuo fotoizstuode “Latgolys bibliotekars – rodūšuma olūts” jau beja apsaverama vairuokuos Latgolys regiona bibliotekuos – Naujinē, Preiļūs, Ludzā i Rēzeknē. Daugovpilī tei eksponāta pyrmū reizi.