Festivals “Osvalds” itūvosor svieteis 20 godu jubileju

Festivals “Osvalds” itūvosor svieteis 20 godu jubileju

8. augustā Baļtinovā jau 20. reizi nūtiks muzykys festivals “Osvalds”. Tys ir vacuokais muzykys festivals Latgolā, tū raksturoj pastuoveiguo pozitivuo jutūne i ari lela muzykala daudzveideiba. Darbeiba itamā jubileja reizē nūtiks iz 4 skotuvu vīnlaiceigi.

Festivala jaunums byus Konkursa skotuve. Tei piļneibā tiks atvālāta jaunajom grupom i izpiļdeituojim. Konkursa mierkis ir atbaļsteit jaunūs muziku rodūšuos aktivitatis, dūmūt vareibu palelynuot jūs skotuviskū pīredzi. Iz ituos skotuvis jaunī izpiļdeituoji ceineisīs par vareibu tikt pamaneitim nu apmeklātuoju, kai ari profesionalys žūrejis pusis. Reizē tei byus ari ceiņa par vareibu tikt pi apmoksuota dzīsmis īroksta laika profesionalā skaņu īrokstu studejā i cytu vierteigu bolvu. Ituos skatuvis gosti – grupa “Dabasu Durovys”.

Tradicionaluo skotuve byus vīta popmuzykys cīneituojim. Kontekstā ar “Osvalda” 20 godu jubileju i pīmiņūt tū, ka festivals ir suocīs kai vītejūs muzykantu saīts, tiks izveiduota eipaša koncertprograma. Tuos ītvorūs apsavīnuos bejušuo Bolvu rajona grupu muziki, kas “Osvaldā” ir pīsadalejuši nu pošu pyrmsuokumu. Taidā veidā apmaklātuojim, it seviški vacuoka goda guojuma i muzykantim, kas veiduoja festivala pyrmssuokumu, byus vareiba sajust eipašū jubileja “garšu”. Iz tradicionaluos skotuvis izastuos ari “Apvedceļš”, Olga Rajecka, Lauris Reiniks, “Borowa MC”, “Forte”. Programu vadeis i publiku izklaidēs Māris Grigaļs.

Stabilu vītu festivalā ījam ari elektroniskuos muzykys skotuve. Tei ir vīta, kur sasavīnoj eksotiska vide (1800 kvadratmetru lels bejušuo kolhoza škiuņs) i azartiska dīdžeju uzastuošona, kū papyldynoj īspaideigs skanis, video i gaismys šovs. Ituo goda skotuvis eipašais gosts COSMONAUT (MegaBeat/Intricate) – grupys “Radiotrance” veiduotuojs, daudzu klasisku storptautiski zynomu elektroniskuos deju muzykys hitu autors, kurs izastuojs kūpā ar taidim muokslinīkim kai “The Prodigy”, “Underworld”, Paul Van Dyk, Tiesto i cytim.

Bīži viņ vysjautruokuo festivala nūrisis vīta ir zaļumbala skotuve, kur vaira i mozuok popularu muzykantu izpiļdejumā skaņ muzyka, kaidu ir īrosts dzierdēt eistā zaļumbalā. Puorsvorā tei ir šlagermuzyka, kas ir vīns nu popularuokajim muzykys žanrim Latvejā. Itūgod iz ituos skotuvis kuops duets Gunārs i Zane, grupys “Liepavots”, “Ginc un Es”, “Transleiteris”, “Brīvdiena”, “Trīs vīri laivā” i muzykants Zintis Krakops. Skotuvis saiminīks byus Daiņs Platacs.

Beletu īprīškpuordūšona bilesuparadize.lv, cena – EUR 8.00.

Print Friendly, PDF & Email