Ondrupinē nūtiks leluo pūdnīka cepļa attaiseišona

Ondrupinē nūtiks leluo pūdnīka cepļa attaiseišona

23. majā 13.00 muzejā “Ondrupinis lauku sāta” sevkurs aicynuots iz seņ gaideitū leluo pūdnīku cepļa attaiseišonu. Jaunū cepli vērs vaļā zynomī Latgolys pūdnīki – Aivars Ušpeļs, Ilmārs Veceļs i Stanislavs Viļums.

Lelajai cepļa attaiseišonai muzejā “Ondrupinis lauku sāta” gatavejās jau īprīšk. 10. majā sevkuram beja vareiba īsasaisteit rodūšajuos darbneicuos i spēlēs, kurys vadeja bīdreiba “Kroma kolna bruoliste”. Sovukuort cepļa pīpiļdeišonai interesenti varēja īt tolkā, pagatavejūt kotrs sovu muola figureņu voi trauceņu kūpā ar Vēsmu Ušpeli nu bīdreibys “Malny Wylky”.

Pasuokumā tyka atkluota ari Oduma Kuopusteņa dorbu izstuode “Muols caur guni iz pūdu”, kas vēļ byus apsaverama leluo cepļa attaiseišonys dīnā.

Gaidamajā pūdnīku cepļa attaiseišonā interesentim byus vareiba redzēt, kai nu cepļa teik calti korstī muola trauki, kas piečuok teik apstruoduoti ar lynellis i bišu voska maisejumu. Varēs dzierdēt Latgolys pūdnīku stuostus par cepļa kūršonu i muola pūdim. Nūsavārtūs traukus byus vareiba ari īsaguoduot.

Muzejs “Ondrupinis lauku sāta” ir 19. godu symta beigu i 20. godu symta suoku Latgolys sadzeivis i tradiceju paudiejs, kas durovys interesentim attaisejs jau 2000. godā. Muzeja kompleksā suokumā ītylpa 6 kuormi, kas izvītuoti kai prototips tipiskai latgalīšu lauku sātai.

Tai kai pūdnīka omots Latgolā ir vīna nu zynomuokajom namaterialuo kulturys montuojuma prasmem, muzejā tyka suokta i ituo gods suokumā pabeigta ari pūdnīku sāta ar lelū cepli.

ondrupine ceplis