LTV atsagrīž stuostu cyklys „Cytaidi latviskais”
Itymā vosorā nu 28. juņa Latvejis televizejā izruodeis trešū 10 stuostu cyklu par Latgolu „Cytaidi latviskais”.
Trešuos sezonys raidejumu pamatā byus personeibys i dzymtys, kas Latgolā kūpj kaidu nūteiktu profesionalu vidi, orūdu ci omotu, ir ar latgaliskū pošapzini.
Raidejuma veiduotuoji itymā sezonā meklēs ari natradicionalys lītys, kas nibyut naasociej ar latgaliskū, nu izsaruoda, ka sadzeivoj i roda nūvoda pīvīnuotū vierteibu. Atsevišķā stuostā varēs īpazeit jaunīšu subkulturys virzīņus – reperus, breikerus, Ausmeņa Records jaunīšus i cytus. Akcents stuostu cyklā lykts iz cylvākim, kas ir interesantys, daže atraktivys personeibys, taipoš raidejumi viesteis par tradicionalom nūtikšonom i paražom. Pīvadumam, raidejuma veiduotuoji gasteis pi Latgolys Kulturys goda bolvys „Boņuks” laureata i gitaru meistara Juoni Kuzminski, varēs izgaršuot Latgolys sīru kūpā ar Lubānu saimi. Stuosti naiztiks ari bez šmukuos Latgolys dobys.
Kai īrosts, raidejumu vadeis Latgolys pietnīks Valentins Lukaševics.
