20. junī Dagdā puļciejuos vaira nakai 900 senioru nu Dagdys, Bolvu, Leivuona, Rēzeknis, Daugovpiļs, Īlyukstis, Kuorsovys, Ludzys, Preiļu, Rībeņu, Viļānu, Viļakys, Kruoslovys, Ruguoju, Vuorkovys nūvodu i Daugovpiļs i Rēzeknis piļsātu.

Dīnys koncertūs pi nūvoda dūmis ākys i Veseleibys i socialūs pakolpuojumu centra “Dagda” senioru kolektivi uzastuoja ar prīšknasumim, kas vyslobuok tūs raksturoj. Daudzys dzīsmis skateituojim beja labi zynomys i partū jī dzīduoja leidza.

Piec dīnys koncertu pošvaļdeibu puorstuovi, kolektivu i senioru bīdreibu vadeituoji puļciejuos iz pījimšonu Dagdys nūvoda pošvaļdeibā, kur sajēme festivala pīminis veļtis. Seniori tikom apmeklēja Dagdys Vyssvātuos Treisvīneibys Rūmys katuoļu bazneicu i nūvodpietnīceibys izstuožu zalu “Patria”.

Svātku koncertā iz skotuvis kuope senioru apvīnuotais kors, kas vīnuojuos kūpeiguos dzīsmēs, pīpyldūt Dagdys parka estradi ar sovim skaneigajim bolsim. Deju laukumu pīpiļdeja vairuoki desmiti doncuotuoju, kas vīnā sūlī izdoncuoja i latvīšu tautys dejis, i modernuos dejis, i linejdejis. Mozuokumtauteibu kolektivu prīšknasumi beja pūļu, krīvu i boltkrīvu volūduos.

Koncerta nūslāgumā festivala karūgs tyka svineigai nūdūts Aglyunys nūvoda dūmis prīšksādātuojai Helenai Streikei, partūka nuokamais – XV Latgolys senioru dzīšmu i deju festivals nūtiks Aglyunā.