18. julī Ančupānu īlejā (kartodromā) nūtiks tradicionaluo Rēzeknis nūvoda dīna, kur paradzātys i sportiskys aktivitatis, i kulturys nūtikšonys.

Nu 12 stuņdem basketbola spēlis cīneituoji varēs nūskaidruot lobuokū komandu strītbola saceņseibuos, sovukuort 14.00 pyrmūreiz nūtiks saceņseibys “Rēzeknis nūvoda stypruokais lauku veirs”. Kab tyktu par vysa nūvoda spieceiguokū veiru, pogostu stiprinīkim sovs spāks i iztureiba byus juopuorbauda vysdažaiduokajuos disciplinuos, tymā skaitā traktora rīpys veļšonā, bolkys ceļšonā, patmaļu akmiņa nesšonā i cytur. Tikom mozī styprinīki sovu izveiceibu varēs puorbaudeit “Pīdzeivuojumu stygā”, kur atrakcejis i stafetis bārnim pīduovuos bīdreiba “Par stipru ģimeni”.

Turpynojūt pārņ īsuoktū “Pogostu dyžuošonuos” tradiceju, ari itūgod Rēzeknis nūvoda pogosti ruodeis, ar kū tī ir stypri i boguoti. Pogostu teltīs byus i omotnīku paraugdemonstriejumi, i rodūšuos darbneicys, i muokslinīciskuos pošdarbeibys kolektivu prīšknasumi, i kulinarais montuojums. Kai īrosts, vysys dīnys garumā apmaklātuojus gaideis ari omotnīku darynuojumu tierdzeņš.

16.00 ar koncertu “Manas mājas dzimtā novadā” suoksīs svātku muzykaluo daļa i tiks gūdynuotys Rēzeknis nūvoda stypruokuos, kupluokuos saimis, kai ari Zalta puori. Sovukuort 17.30 sevkurs aicynuots īveit ari sovu bolsu storptautiskuo folklorys festivala “Baltica” Dižkoncerta kūpkorī, kur iz vīnys skotuvis kuops i vītiejuos skaneiguokuos folklorys kūpys, i ari gosti nu Boltkrīvejis, Gruzejis, Portugalis, Norvegejis, Ukrainys i cytom vaļstim. Tī, kurim nabyus vareibys “Baltica” Dižkoncertu redzēt i dzierdēt kluotīnē, tuos pošys dīnys vokorā, 21.00 tū varēs vērtīs Latvejis Televizejis 1. kanalā.

Tikom Ančupānu īlejā ļusteiba turpynuosīs. Nu 20.00 da pošai reita gaismai sevkurs ir aicynuots izadoncuot svātku koncertā, kur iz diveju skotuvu sovus lobuokūs “gobolus” izdzīduos 13 grupys i muziki, tymā skaitā “Pērkons”, “Skyforger” “Musiqq”, “Galaktika”, “Sovvaļnīks”, “Rikši”, “Green Novice”, Jurs Ostrovskis, “Kapļi”, Igauņu saime i cytys.

Īīšona iz vysim pasuokumim – breiva.

Karteņa: Rēzeknis nūvoda dīna 2013. godā (autore Inese Čiževska)