Jau tradicionali juļa beiguos Dagdā tiek svieteiti Annys svātki. Ari itūgod nu 22. da 25. juļa byus vareiba baudeit vysaidus kulturys, sporta i izklaidis pasuokumus.

Svātki tiks atkluoti ar pasuokumu “Novads dzied!”, kurā sasadzīduos vysu pogostu ļauds. 22. i 23. julī nūtiks nūvoda īpazeišonys pasuokumi – velomaratons “Ežezera noslēpumi” i ekskurseja “Aplis pa Dagdas novadu!”. Sportisku aktivitašu cīneituoji varēs pīsadaleit voi just leidza pludmalis volejbolā, nakts strītbola turnirā voi Iztureibys skriejīnī puorbaudeit sovu spāku i iztureibu.

Tradicionalais pīktdīnis godatiergs tiks papyldynuots ar pogostu īstuožu i dzeivuotuoju rodūšuma ideju izpausmem piļsātys skverā, atraktivu folklorys izvadumu “Kod saimineicys gostus gaida” i vareibu bez moksys īpazeit Dagdys legendys zyrgu pajiugā. Pīktdīnis vokorā vysi teik aicynuoti uz koncertu, itūgod Dagdā gasteis Latvejā īcīneituo dzīduotuoja Antra Stafecka i grupa “Otra Puse”.

Vysi zyrgu meiļuotuoji varēs puļcētīs sastdiņ iz rikšuotuoju saceņseibom Dagdys muižā. Nūvoda pošdarbeibys kolektivu prīšknasumus varēs baudeit koncertā pi veseleibys i socialūs pakolpuojumu centra “Dagda”.  Vokorā piļsātys parka estradē nūtiks Dagdys nūvoda svātku “Annas Dagdā” nūslāguma koncerts.

Vaira informacejis par pasuokumim, dasasaceišonu i daleibys nūsacejumim var izzynuot Dagdys nūvoda sātys lopā.