Baļtinovā nūsasliedzs projekts “Tev, man un visiem mums – lai top Baltinavā”

Baļtinovā nūsasliedzs projekts “Tev, man un visiem mums – lai top Baltinavā”

Aizvadeitais gods nu projekta “Tev, man un visiem mums – lai top Baltinavā” suokšonys šaļts, aizskriejs vieja spuornim. Tys tyka pīpiļdeits ar gryutu dorbu, lelu ryupeigumu i gondarejumu par padareitū.

Projekta golvonais mierkis beja izveiduot tautā zynomuos lugys “Ontans i Anne” Tematiskū parku. Ideja par parka izveidi roduos bīdreibai “Jaunieši Baltinavai”, kas gribēja sakūpt sova dzymtuo nūvoda kulturviesturiskuos vītys, kurom seņču atmiņuos ir lela vierteiba. Vīna nu taidom vītom beja Baļtinovys Vacais parks, kas godu gaitā beja pagaisynuojs sovu ogruokū spūžumu, globojūt tū aiz aizaugušim upis krostim.

Goda gaitā parka teritoreja ir pīdzeivuojuse lelys puormainis. Puor upi izaslīn jauns tylts, iz kura īreikuoti sūleni dobys baudeituojim. Izveiduots bruka celeņš i “Ontana i Annis” silueti, pi kuru var nūsabiļdēt, īsajiutūt lugys varūņu tālūs. Izcalta lapene, kas ir breineiga atpyutys vīta parka apmaklātuojim, pastateitys šyupelis i foto rams dobā, kas ļaun īmyužynuot sevi, saimi i draugus breineiguos karteņuos, kai ari izgataveiti sūli i gunkura vīta pateikamys atmosferys radeišonai.

Atsaverūt iz padareitū, juosoka, ka dorbs ir īguļdeits lels i bīdreibys “Jaunieši Baltinavai” mierkis ir sasnāgts. Ir izveiduots i “Ontana i Annis” parks, i ir sakūpta parka teritoreja, kas niu prīcynoj sevkuru garumbraucieju. Dorbojūtīs kai breivpruoteigī, bīdreibys “Jaunieši Baltinavai” puorstuovi ir lapni par paveiktū, partū ka skaita, ka myusu dīnuos cylvāki puoruok daudz gryb sajimt nikuo nadūmūt preteimā i materialuos vierteibys nūviertej augstuok nakai paleidzeigys rūkys dūšonu. Projekta realizacejis laikā bīdreibys jaunīši sakūpe na tik sova nūvoda kulturviesturiskuos vītys, nu ari styprynuoja sovu draudzeibu, dorbojūtīs vīnuotim mierkim, kai ari sajēme atbolstu nu cytu nūvoda dzeivuotuoju, styprynojūt Baļtinovys nūvoda dzeivuotuoju salīdieteibu.

Itūšaļt “Jaunieši Baltinavai” ar napacīteibu gaida projekta atkluošonys dīnu, kas byus 11. juļs, kurā oficiali tiks paziņuota parka atkluošona. Pasuokums tiks aizvadeits kūpā ar teatra izruodi “Ontans i vampiri”.

afisha-Ontons i Anne