Nūtiks 6. Latgolys Vargaņu dīnu festivals

Nūtiks 6. Latgolys Vargaņu dīnu festivals

varganu dinysNu 17. juļa da 2. augusta vairuokuos Latgolys katuoļu bazneicuos, kuruos da šam ir sasaglobuojušs eistys stabuļu varganis, nūtiks 6. Latgolys Vargaņu dīnu festivals.

Festivala mierkis ir popularizēt vargaņspēlis kuļturu i latvīšu vargaņmuokslu, dūt atspaidu vargaņu uzturiešonai i apkūpei, kai ari vēļreiz aplīcynuot tū, ka Latgola i Latveja var lepuotīs ar spūdru varganistu saimi. Latgolys Vargaņu dīnys ir lobdareibys pasuocīņs – īīšona vysūs koncertūs ir par zīduojumim. Ituo goda festivalā savuoktī pazīdi tiks nūdūti Nautrānu Romys katuoļu bazneicys vargaņu restauracejai (ituos varganis īguoduotys 1939. godā i ir vaļsts zeimeibys muokslys pīmineklis).

Festivalā uzastuos varganisti Edeite Alpe, Diāna Jaunzeme, Ilona Birgele, Iveta Pelše, Juoņs Pelše, Larisa Carjkova, Guna Kise, Baiba Betlere, Daugovpiļs muzykys vydsškolys i J. Ivanova Rēzeknis Muzykys vydsškolys audziekni, kai ari solisti – klavesiniste Ieva Salīte, legendarais estradis dzīduotuojs Žoržs Syksna, operdzīduotuoja Ilona Bagele i tautā īmeiļuotais muzykants Andris Baltacs (grupys “Baltie lāči” solists). Ituo goda festivala gūda gosts i gostu koncerta varganists – Latvejis muzykys akademejis profesors, ilggadeigs vargaņu muzykys pedagogs, vargaņu restaurators, vargaņbyuvis eksperts i pasauļa slovonais koncertvarganists Tuolivalds Deksnis.

Vairuokūs koncertūs ar video projekcejis paleidzeibu varēs vāruot varganistu spieli tyvplanā, kai ari, turpynojūt tradiceju, piec koncertu klauseituojim byus vareiba vāruot instrumenta demonstriejumus, izdūt vaicojumus varganistim i paraudzeit sovus spākus, īsajiutūt varganista vītā.

Festivala nūtikšonys:
• STIERNĪNIS SV. LAURENCEJA RŪMYS KATUOĻU BAZNEICA – 17. julī plkst.20.00.
• MALNOVYS JAUNOVYS MARIJIS – RŪŽUKRŪŅA KARALĪNIS KATUOĻU DRAUDZIS BAZNEICA (Kuorsovā) – 18. julī plkst. 19.00.
• AGLYUNYS BAZILIKA – 19. julī plkst. 13.00.
• RĪBEŅU SV. APOSTULU PĪTERA I PUOVULA RŪMYS KATUOĻU BAZNEICA– 24. julī plkst.18.00.
• NAUTRĀNU RŪMYS KATUOĻU BAZNEICA– 25. julī plkst.14.00.
• VIĻAKYS VYSSV. JEZUS SIRDS RŪMYS KATUOĻU BAZNEICA – 2. augustā plkst.15.00.
• RĒZEKNIS JEZUS SIRDS KATEDRALE – 2. augusts plkst. 18.00.

Print Friendly, PDF & Email

Nūtikšonu kalendars

May
20
Pīk
19:00 Artura Skuteļa lelkoncerts “Jā” @ koncertzale "Palladium"
Artura Skuteļa lelkoncerts “Jā” @ koncertzale "Palladium"
May 20 @ 19:00 – 22:00
20. majā Reigā, koncertzalē “Palladium” nūtiks latvīšu hip-hopa muzika Artura Skuteļa lelkoncerts i jaunuo albuma “Jā” prezentaceja. Kai lelkoncerta eipašuo gaška ar sovu soloprogramu iz skotuvis kuops ari latgalīšu repere Ūga, kuruos 2020. godā izdūtais[...]