Vyšku pogostā skaneigi i kruošni izskanēja Latgolys deju svātki “Večerinka Vyškūs”, kurūs puļcējuos kupla Latgolys doncuotuoju saime. Gostus, kas beja sabraukuši nu molu molu, sirsneigai uzjēme lelsaiminīki Ontons (Māris Susejs) i Apoloneja (Anita Auzāne).

Nūvodam rakstureiguos dejis iz Vyšku estradis izdoncuoja 98 kolektivi nu 7 Latgolys deju apriņču – Bolvu, Daugovpiļs, Jākubpiļs, Kruoslovys, Ludzys, Preiļu i Rēzeknis. Jaunīšu, vidiejuos paaudzis i senioru kūpys puorstuovēja 22 nūvodus i 3 piļsātys. Pasuokumu reikuoja Daugovpiļs nūvoda dūme, Kulturys puorvaļde, Vyšku pogosta puorvaļde ar Latvejis Nacionaluo kulturys centra i VAS “Latvijas dzelzceļš” atbolstu.

Koncertā pīsadaleja ari eipašī gosti – grupa “Green Novice”, dzīduotuoja Laura Bicāne, Ambeļu pogosta folklorys kūpa “Speiga”, Naujinis pogosta folklorys kūpa “Rūžeņa” i Vabalis pogosta etnografiskais ansamblis “Vabaļis”.

Večerinkys Latgolys pusē vys vēļ ir dzeivys, koč i niu tuos ir dabuojušys cytu saturu i jaunu šarmu. Folklorys kūpu teiciejis nu Vabalis zynuoja pastuosteit, ka tod, ka večerinkā gryb nūsavērt bryutgonu, tod juosaver, kai nūsavārtais doncoj – ka vaira bolstuos iz lobuos kuojis – byus lobs saiminīks, ka iz kreisuos – tod zam rynduku viņ tupēs. Sovukuort naujinīši zynuoja saceit, ka večerinkā doncojūt izberž tulznys, tod dorba zyrgam pokovs nūkriss, sovukuort Ambeļu pusē bryutgonu var dabyut, ja ryndukus kuorteigai nūzīž ar madu.

Daugovpiļs nūvoda dūmis prīšksādātuoja Janina Jalinska sveice Latgolys deju svātku “Večerinka Vyškūs” muokslinīciskū vadeituoju Aiju Daugeli i svātku viersvadeituojus –  Ilmāru Dreļu, Agri Veismani, Elitu Treiloni, Valdu Timuli, Sarmeiti Stapuli, Siļveju Kurteņu i Ilzi Broku.

Svātku kulminacejā skateituoji i doncuotuoji vīnuojuos kūpdziesmē “Pi Dīveņa gari goldi” ar solisti Lauru Bicāni. Večerinka turpynuojuos kapelys “Dziga” i Dj Gata pavadeibā.