25. julī Vileks nūvoda Borisovys vacduorzā nūtiks muzykantu saīts. Tymā muzicēs Latgolys muokslinīki – grupys „P.S. Sala”, „Gandreiž 10-nīkā”, „Napruots”, pīsadaleis ari Juoņs Poplavskis i dzīdūšuo Sprukuļu saime. Suokums 21:00 stuņdēs, īeeja pasuokumā bez moksys.

Pyrmsuokumi muzykantu saītam Borisovā meklējami jau 80. godu vydā, kod tūreizejais kulturys dzeivis organizators Aleksandrs Kuzmans beja nūorganiziejs divus folklorys festivalus Borisovys vacduorza vacajā estradē. Sovukuort muzykantu saīta īdybynuotuojs taidā formā, kaidā tys nūguojs da myusu dīnom, beja Vileks nūvodam nūzeimeigs sporta i kulturys darbinīks, muzikis Ainis Šaicāns, kura pīmiņai ari veļteitys ituo goda saīts.
A. Šaicāns, muzicejūt sovā grupā „Leijerkastnieki” vīnmār centīs nest Latgolys vuordu pasaulī. Dzīšmu tekstūs ītvarta dzymtuos pusis i tuos cylvāku mīlesteiba, dobys skaistums i vīnreizeiba. Eipašu atzineibu giva Aiņa Šaicāna i juo grupys izpiļdeituo dzīsme „Latgalīte” i „Meža dziesma”, ar kurom pīsadaleja Šlageraptaujā.