1. augustā Rēzeknis Augstškolā (RA) nūtiks svineigs pasuokums “Augstākajai izglītībai Rēzeknē – 90”, kur tiks akcentāta Rēzeknis Augstškolys lūma augstuokuos izgleiteibys tradicejis puormontuošonā i kūpšonā, gostūs tiks gaideiti ministreju puorstuovi, sadarbeibys partneri, kai ari Rēzeknis Augstškolys absolventi i, prūtams, vysi tī, kuri nazkod vuiciejušīs voi struoduojuši Rēzeknis Pedagogiskajā školā, Rēzeknis internatškolā, Rēzeknis Vaļsts školuotuoju institutā i Rēzeknis školuotuoju institutā.

Nesaverūt iz tū, ka RA juridiski dybynuota 1993. godā, tei teik skaiteita par 1925. godā izveiduotuo Rēzeknis Vaļsts školuotuoju instituta ideju maņtineicu. Viesturiskuos situacejis, socialuo i kulturys konteksta maiņuos, akademiskuo inteligence Atbreivuošonys alejā 115, kas itūšaļt veidojās par modernu studentu piļsieteņu, namaineigai nūdrūšynuoja augstuokajim kvalitatis standartim atbylstūšu izgleiteibys, pietnīceibys i kulturys saglobuošonys, uzturiešonys i tuoļuoknūdūšonys miseju. Itūšaļt RA ir studiejūšūs skaita ziņā septeituo leluokuo vaļsts augstškola ar 15 studeju vierzīnim, storptautiski atpazeistamu pietnīciskū darbeibu i pīsuotynuotu kulturys dzeivi.

1. augustā jau nu 13.00 ekskursejuos varēs apsavērt RA telpys, byus svineiguo Senata sēde. 16.00 byus vareiba nūsaklauseit jauktuo kora “Sonitum” i Rēzeknis nūvoda vokaluos studejis “Skonai” koncertu, nu eisai pyrma 20.00 byus sadaņcs kūpā ar deju kūpu “Dziga”. Vokorpusē varēs pīsavīnuot augstškolys saimei i kūpā dūtīs Rēzeknis piļsātys svātku guojīnī, sovukuort 21.00 suoksīs Absolventu saliduojums: postfolklorys grupys “Rikši” koncerts, Jura Vucāna i Oskara Orlova (Raibuo) jūku performaņcis, bals kūpā ar ansambli “Brokastis četratā”. Tiks nomināti spylgtuokī augstškolys absolventi vaira nakai 40 studeju programuos.