21. julī 20.00 Preiļu Vaļsts gimnazejā nūtiks lelais stuostu vokors par pīdzeivuojumim jauneibā “Kū tu jaunam padareisi?”. Atraktivus stuostus par pīdzeivuojumim i nūtikšonom sovā dzeivē stuosteis UNESCO Latvejis Nacionaluos komisejis (LNK) teikla “Stāstu bibliotēkas” dalinīki i individualī stuostnīki nu vysys Latvejis.

Par jautreibu i daņčim guoduos folklorys kūpa “Rūtoj”. Īīšona – bezmoksys.

Pasuokums nūtiks kasgadiejuo UNESCO LNK teikla “Stāstu bibliotēkas” dalinīku vosorys školys ītvorūs. Itūgod tei nūteik Preiļūs, kab izzynuotu vītiejū Latgolys kulturys montuojumu i īpazeitu vītiejūs stuostnīkus, kai ari folklorys kūpu izkruotuos zynuošonys.

UNESCO LNK teikls “Stāstu bibliotēkas” ir eipaša sadarbeibys i pīredzis apmainis platforma, kurā teik eistynuotys lela tematiskuo lūka kulturys montuojumam i stuosteišonys tradicejai veļteitys aktivitatis.

Stuostu stuosteišona i klauseišonuos ir vīna nu senejuokajom cylvāku pamatvajadzeibom, kas nūdrūšynoj i pasauļa izzynuošonu i socialūs prasmu izkūpšonu, i vareibu sevi realizēt vysa myuža garumā. Stuosteišonys tradicejis populariziešona i atteisteišona sevkurā regionā veicynoj vītiejuos sabīdreibys sovstarpiejū komunikaceju i storppaaudžu dialogu, kai ari interesi par vītiejū montuojumu, tuo apzynuošonu i saglobuošonu.