1. augustā Rēzeknē, Galdnīku īlā 8, nu 12.00 da 15.00 prasmeiguokuos Latgolys saimineicys ruodeis, greznuos i dekorēs sovus kruošņūs i soldonūs meistardorbus, sasacenšūt “Rimi Latvia” reikuotuo konkursa “Latvijas gardākā kūka” regionalajā pusfinalā. Latgolys pusfinalā Rēzeknē sasatiks ostonis lobuokuos tortu cepiejis nu Latgolys, draudzeigā ceiņā nūskaidrojūt divejis saimineicys, kurys aizstuovēs Latgolys regiona gūdu konkursa finalā Reigā, pretendejūt iz Latvejis gorduokuos torta cepiejis titulu.

Daleibai konkursa regionalajā pusfinalā Rēzeknē tortu meistaris nu Latgolys beja īsnāgušys 12 tortu receptus, kuru vydā beja i tradicionalī mada i biskvita torti, i cyti originali i mozuok zynomi svātku gordumi. Latgolys saimineicu īsnīgtī tortu recepti tyka vārtāti piec taidim kritereju kai torta vizualais nūformiejums i originalitate, recepta sastuovdaļu daudzveideiba, kai ari pamatuojums, parkū itys torts ir peļnejs sajimt Latvejis gorduokuos torta titulu. Latvejā zynomi ēsttaiseišonys eksperti – Rimi Gordieži– daleibai konkursa Latgolys pusfinalā izvierzejuši 8 tortu recepšu autoris:

– Ilzi Rudzišu (torts “Svaigais citronu muokūņs”)
– Veniju Rancāni (torts “Vosorys nakts”)
– Vitu Dauksti (torts “Latgolys meitine”)
– Andu Lūsi (“Brūniņmātes kūka”)
– Jevgeneju Zaicevu (torts “Šokolada kārdynuojums”)
– Martu Rubinu (“Martas kūka”)
– Skrudru saimi (torts “Skudru pyuznis”)
– Solvitu Avdeviču (Šokolada capumu torts)

Latgolys ostoņus gorduokūs tortus Rēzeknē viertēs Rimi Gordieži. Jī kluotīnē viertēs na viņ tortu garšys boguoteibu, nu ari vizualū nūformiejumu i Latgolys tortu cepieju meistareibu. Kotra regiona pusfinala diveju lobuokūs recepšu autori duovonā sajims kuknis kombainu. Piečuok vysi konkursa “Latvijas gardākā kūka” pusfinalu uzvarātuoji sasatiks Reigā, kab sasacanstu par golvonū bolvu – duovonu karti nu “Rimi” 500 eiro vierteibā i Latvejis gorduokuo torta cepieja titulu.

Latgolys regiona tortu konkursa pusfinals Rēzeknē nūtiks piļsātys svātku ītvorūs. Pasuokums tiks atkluots 12.00, tuo laikā par muzykalū baudejumu ryupēsīs legendarais estradis dzīduotuojs Žoržs Syksna. Sovukuort mozuokī pasuokuma apmaklātāji varēs rodūši izapaust “Rimi” bārnu styureitī. Pasuokuma nūslāgumā Rimi Gordieži kluotynasūšūs prīcynuos ar gordu puorsteigumu.