Vīni nu skaistuokajim svātkim vosorys sezonā Bolvu piļsātā ir Bolvu nūvoda svātki. 22. augustā tī nūtiks jau sastū reizi.

Svātkim jau ir izaveiduojušys lobys tradicejis, kurys teik pylnveiduotys i papyldynuotys. Vīna nu taidu tradiceju ir kūpeiguos lyugšonys bazneicuos.

Ari Tautys pyutieju orkestra “Balvi”  koncerts Bolvu nūvoda svātkūs ir kai naatjemama sastuovdaļa, itūgod tys nūtiks 12.00 laukumā pi Bolvu Kulturys i atpyutys centra, leita gadīnī Bolvu KAC lelajā zalā.

Svineigajā pasuokumā “Plecu pie pleca” 14.00 laukumā pi Bolvu Kulturys i atpyutys centra tiks apbolvuoti konkursa “Sakoptākais īpašums 2015” uzvarātuoji. Itū sareikuojumu kuplynuos deju kūpa “Nebēda” i “SOS fanfare” nu Francejis. “SOS fanfare” ir nalels izpiļdeituoju ansamblis aba fanfara, kai tū sauc Francejā, nu Lotringys, kas spielej prīceigu muzyku, popularus šansonus i diksilendu. Grupys dalinīki ir:  Mister Goldhand (alta saksofons), Yeah Man (tenora saksofons), Bouba (bandžo), Ventilo (suzafons) i Diddle Man (perkusejis).

Nu 13.00 da 17.00 Luoča duorzā byus vareiba apsavērt sātys lūpeņus, kuru ari laukūs palīk vys mozuok. Pasuokuma organizatori aicynoj atsasaukt nūvoda ļauds, kurim ir vareiba atvest iz piļsātu sovu sātys dzeivinīku – vušku, kozu, gūvi, zyrgu, kurkynu, peili, zūsi i cytus.

Bolvu piļsātys parkā leluoka rūseiba nūtiks piecpušdīnē. Parka teritorejā nu puču tiks veiduota Bolvu nūvoda kontura, kurā kotrs pogosts sovu pogosta konturu izrūtuos ar zīdim. Nu 15.30 parka teritorejā nūtiks pogostu prezentaceja. Kotrs pogosts byus izveiduojs sovu pogosta sātu, īkuortuojs un izpuškuojs, i pavysam eisā laikā prezentēs sovu pogostu ar pošu lobuokū, kas tam ir. Nuokušuos stuņdis laikā vysu pogostu bārnu i jaunīšu komandys pīsadaleis atraktivuos saceņseibuos “Kopā jautri!” Nu kotra pogosta pīsadaleis 3 puiši i 3 mārgys nu 14 da 18 godu. 17.30 “Ūdens karnevāls”  – poštaiseitu peldleidzekļu izbraucīņs Bolvu azarā. Vysi teik aicynuoti puorvērst sovu laivu voi katamaranu eipašā nūformiejumā i dūtīs nalelā izbraucīnī par prīcu sev i cytim.

18.30 paradzāts rodūšs svātku guojīņs, kurymā aicynuoti pīsadaleit vysi Bolvu nūvoda pogosti, Bolvu piļsātys īstuožu, uzjāmumu darbinīki i cyti interesenti. Tema: “Dzeive laukūs”. Maršruts: stuošonuos laukumā pi Kulturys i atpyutys centra – Breiveibys īla – Tierga īla – Teatra īla – Partizanu īla – Breiveibys īla.

Nailgi pyrms guojīņa byus vareiba redzēt braucamreiku paruodi, kura puorsavītuos pa Bolvu īlom, garum Bolvu Kulturys i atpyutys centra laukumam i izavītuos iz Breiveibys īlys gar parku. Aicynuoti vysi, kurim ir kaids puorsavītuošonuos leidzeklis, kuru ir īspiejams izrūtuot atbylstūši svātkim, izbraukt nalelā svātku paruodē.

19.00 svātku nūslāguma sareikuojumā “Gavilēsim priekā!” tiks gūdynuoti Bolvu gūda pylsūni i padūti Bolvu nūvoda Atzineibys raksti. Apmaklātuojus prīcēs ari bruoļu Auzānu i Jersikys orkestra koncerts, kam sekuos zaļumbals kūpā ar grupu “Ginc un Es” .