Spūdrai i skaneigai nu 31. juļa da 2. augusta tyka svieteits Rēzeknis 730. jubilejs – dzeivuotuoji sovai piļsātai vielēja vyslobuokuos dūmys i sajēme eipašu muzykalū duovonu – J. Lūsēna i G. Rača dzīsmi “Pilsēta ar rozi matos”.

31. juļa vokors Rēzeknis piļskolnā aizritēja vydslaiku nūskaņuos, ļaunūt vērtīs Latvejis, Polockys i Vitebskys viesturis rekonstrukceju klubu simboliskys ceinis, i piec mīra leiguma nūsliegšonys baudeit breineigu Ivo Fomina koncertu.

1. augustā piļsātys stadionā “Daugava” nūtyka aktivys saceņseibys vysaidūs sporta veidos, sovukuort Latgolys Kulturviesturis muzejā i Festivala parkā leli i mozi meistaruoja, kruosuoja i raksteja vieliejumus Rēzeknei. Da vokora koncerta vysi vieliejumi beja dastyprynuoti pi hēleja balonu i,  skaņūt eipašai Juoņa Lūsēna i Guntara Rača veļtejuma dzīsmei “Pilsēta ar rozi matos”, 730 baloni izliduoja dabasūs, nu piec nakts muzykalūs stryuklaku koncertizvaduma “Satikšanās Rēzeknē” dabasūs uzmirdzēja ari spūdra uguņuošona.

Rēzeknē nūtyka ari “Rimi Latvia” reikuotuo konkursa “Latvijas gardākā kūka” regionalais pusfinals, kurā tyka nūskaidruotys divejis lobuokuos tortu meistaris Latgolā – Ilze Rudziša nu Rēzeknis ar tortu “Svaigais citronu muokūņs” i Marta Rubina nu Krystpiļs nūvoda ar “Martas kūku”.

Rēzeknis piļsātys svātku guojīnī sevi prezentēja 30 komandys, pyrmūreiz pīsadaleja i žūrejis viertiejumā 1. vītu sajēme Rēzeknis Dzeivinīku audzātuoju bīdreibys komanda, 2. vītu – bīdreibys “Eņģeļi ar mums” komanda “Lobs ar lobu sazatyka” i 3. vītu – bīdreibys “Centrālais auto moto klubs Latgale” komanda “CAMK Latgale”.

2. augustā leli i mozi devēs Saimu paruodē, prīcynojūt skateituojus ar spylgtim i originalim kostimim i vysaidu bārnu braucamreiku nūformiejumu. Žūrejis viertiejumā 1. vītu sajēme Ovsjankinu saime, kuri pošrūceigai beja izveiduojuši puosokainu karīti, 2. vītu – Vasjkovu saime ar vaclaiceigu karuseli, 3. vītu – Ševirjovu saime ar tematiskū nūskaņu “Polīna aizspogulijā”.

Mozūs skateituojus svātdiņ ar vysaidim kīmejis eksperimentim prīcynuoja i puorsteidze šovs “Ķertais profesors”. Eipašu duovonu piļsātai padeve ari vītiejuo autore Ineta Atpile-Jugane, prezentejūt dzejis gruomotu latgalīšu volūdā ar meitenis ilustracejom “Otkon giunu sapynus” i duovojūt pyrmajim 100 skaiteituojim gruomoteņu bez moksys.

Svātdiņ nūtyka ari saceņseibys svoru stīņa spīsšonā guļus iz reižu skaitu “Latvijas spēcīgākā pilsēta”. Riezeknīši kūpā puorcyluoja 191 360 kg i itūšaļt Rēzekne ir 2. vītā. Riezeknīši ir puorspiejuši ari īprīkšiejūs individualūs rekordus jaunīšu i veiru grupā – par spieceiguokū jaunīti palyka riezeknīts Vladislavs Groms, kurs 20 kg gryutū svoru stīni izspīde 300 reizis i jaunu rekordu veiru grupā izstuodeja Andžejs Ribakovs – 50 kg gryutū svora stīni izspīžūt 105 reizis.

Karteņa: Anna Kuzmina