Itūreiz raidejumā nabrauc ar mašynu, ari ar moci, nā, itūreiz kuop laivā! Raidejuma autors Valentins Lukaševičs skaita, ka stuosts par nūvodu nabyus piļneigs, ka koč reizi natiks izbaudeiti Latgolys upu teiksmainī krosti, straujī leiklūči i viļteiguos kruocis. Ari jis pats zeimuli nūmaineis pret airi i iudiņa turisma entuziasta Juoņa Vilcāna vadeibā izbaudeis Tartaka burveibu. Raidejums ļaus sevkuram sasajust kai laivā, partū ka četrus kilometrus Tartaka — upis, kura savīnoj Rušyuna azaru ar Cireiša azaru, izbrauks piļneibā — puorvarūt kūku sanasumus, izbraucūt šaurys i sarežgeitys patiļtis, verūtīs iz dobu i putynim, sadzeivojūt ar zyvu giviejim. Naizpaliks stuosts par pīradzātū upu ceļūs i īsacejumi, kurys upis Latgolā juoīviertej na nu krosta, nu laivā siežūt.