Cytaidi latviskais pi nūvodpietnīka Ivara Logina
Itūreiz raidejums brauc iz Zīmeļlatgolu, kur vīnkuoršā lauku sātā Nāstrovys azara krostā atrūn entuziasma pylnu vysa latgaliskuo popularizātuoju Ivaru Loginu, kurs taišni tymā reitā ir kurynuojs malnū pierti, kab realizātu poša īdybynuotū tradiceju – kapceit gaļu sev i draugim. Ivars dzims, audzs i lelu daļu sova laika pavoda Reigā, kur dorbojās kai antikvaru lītu eksperts. Atmūdys godūs atkluoja sevī latgaliskū identitati, nu tuos šaļts daudz laika pavoda Latgolā – i te dzeivojūt, i pietejūt senejūs piļskolnus, akmiņus, kūpūt i saglobojūt dobu.
Nūvodpietnīks kolekcionej latgalīšu gruomotys, postkartis, muokslys dorbus i citus ratumus. Ir vairuoku latgalīšu sabīdryskūs organizaceju bīdrs, kas aplīcynoj tū, ka ir azartisks latgaliskuma saglobuotuojs. Latgalīšu rakstnīks, raidejuma vadeituojs Valentins Lukaševičs piec sarunys, čaja i kapcejumu baudeišonys secynuos, ka dzierksts, kas dag Ivara sirdī, īkvālynoj ari cytus cylvākus.
