Oktobrī pyrmizruodi pīdzeivuos kina par dzīduotuoju Aiju

Oktobrī pyrmizruodi pīdzeivuos kina par dzīduotuoju Aiju

1. Aija -Andra Dzerves foto17.oktobrī 14.00 Rēzeknis nūvoda dūmis Lelajā zalā (Atbreivuošonys aleja 95a) pyrmizruodi pīdzeivuos Latgolys entuziastu grupys “Biļdis” veiduotuo dokumentaluo kina par dzīduotuoju Aiju Rimšu “Īsamirdzi zvaigznem leidza”, kab atguoduotu, prīcuotūs i skumtu, kab lepuotūs i pasasaceitu, ka jei beja i ar radeitajom dzīsmem ir mums kluotyn. I byus vysod, myrdzūt leidza zvaigznem, informej projekta idejis autore Ineta Atpile-Jugane. Sovukuort Latgolys Kulturviesturis muzejā nu 17. oktobra da 11. novembra byus apsaverama tematiska izstuode “Piederēt savai nolemtībai”, kas veļteita Aijis personeibai i daiļradei.

Īsamirdzēt leidza zvaigznem var, ka tu esi zvaigzne voi tovi dorbi runoj poši par sevi, izstorojūt gaismu, kū navar dzēst ni laiks, ni tymsa, ni suopis, ni ceļš, ni naatbyldami vaicuojumi. 14. oktobrī palīk 10 godu nu talanteiguos dzīduotuojis Aijis Rimšys aizīšonys myužeibā, tok jei vys vēļ spūdrai speid pi Latvejis muzykys dabasu, juos bolss uzrunoj daudzus klauseituojus, juos radeituo muzyka i vuordi līk i pasaceļt spuornūs, i aizadūmuot, i dūtīs leidza sapynam, i patīsi i dzili skumt, suopēt i vaicuot.

Kinys veiduotuoji ir Latgolys entuziastu grupa “Biļdis” (ideja, scenarejs – Ineta Atpile-Jugane, video, montaža – Sergejs Čakāns, video – Artis Vītols, dorba grupa – Edgars Blinovs, Pīters Laizāns, Vitālejs Dudarenoks).

Kina radeita nu 2014. goda pavasara da 2015. goda rudiņa. Tuos veiduošonā sovu atbolstu davuse i Aijis saime, i Aijis dzeivē tyvi i nūzeimeigi cylvāki, muziki i Aijis kolegi, leidzgaitnīki. Kinys veiduotuoji pasasoka Aijis mamai Marijai Tāraudei, Aijis dālim Ilvaram i Intaram Rimšim, Pīteram Laizānam, Andram Dzērvem, Eināram Lipskim, Andram Šīrantam, Normundam Liepiņam, Daiņam Platačam, Teņam Bikovskim, Valentinai Lohovai, Siļvejai Kolesnikai, Inesei Grāvlejai par daleišonūs puordūmuos, pīdzeivuotajā, kūpā veidojūt atmiņu stuostu par naatkuortojamū i talanteigū dzīduotuoju, personeibu i vīnkuorši cylvāku – Aiju.

Kinā izmontuoti materiali nu Aijis saimis arhiva, Latvejis Televizejis arhiva, Latvejis Radejis arhiva, P. Laizāna, V. Lohovys, A. Dzērvis, A. Bondarenko personeiguo arhiva.

Kinu atbolsta Rēzeknis nūvoda dūme, Latgolys Kulturviesturis muzejs, Latvejis Radeja 2, SIA “Projektēšanas birojs AUSTRUMI”, IK- VP 10 i cyti.

Kinys veiduotuoji par atbolstu dorba gaitā i pyrmizruodis organiziešonā paļdis soka Monvīdam Švarcam, Anastasejai Strautai, Armīnam Ruoņam, Juoņam Poplavskim, Ivo Dembovskim, Vasilejam Pukinskim, Aleksandram Bondarenko.

Piec pyrmizruodis kinu var dasaceit ruodeišonai vysā Latvejā, rokstūt bildis@inbox.lv.

Karteņa nu Andra Dzērvis arhiva

Kalenders

May
16
Pīk
16:00 13. Storptautyskuo keramikys muo... @ Rotko muzejs
13. Storptautyskuo keramikys muo... @ Rotko muzejs
May 16 @ 16:00 – 17:30
13. Storptautyskajā keramikys muokslys simpozejā pīsadola pīcpadsmit muokslinīku nu septeņu vaļstu: Viktorija Maroti (Viktória Maróti, Ungareja), Brita Dīrnesa (Brit Dyrnes) i Eivinns Solli (Eyvind Solli, Norvegeja), Teodora Cirakoglu (Theodora Tsirakoglou, Grīkeja), Narankhū Sukhburens (Narankhuu Sukhburen,[...]
May
17
Sai
all-day Anatolija Zelča izstuode “61. ki... @ Latgolys Kulturviesturis muzejs
Anatolija Zelča izstuode “61. ki... @ Latgolys Kulturviesturis muzejs
May 17 all-day
Gleznuotuojs, Latvejis Muokslys akademejis Latgolys filialis docents Anatolijs Zelčs rodūšajā darbeibā puorsvorā zynoms kai portreta i figuraluos gleznīceibys žanra puorstuovs, realismu savynūt ar robustu materialitati, smolku detalizaceju i sarkastisku ironeju. Tok itūreiz izstuodē “61. kilometrs”[...]
all-day Izstuode “Paātrinājums” @ Jaunbyuvis biblioteka
Izstuode “Paātrinājums” @ Jaunbyuvis biblioteka
May 17 all-day
Izstuodei izalaseitys sešys izcylys personeibys; kotra nu tūs puorstuov kaidu nu sešu Latvejis kulturviesturiskūs nūvodu, apzynuotai izcalta gruomatnīku darbeiba uorpus golvyspiļsātys. Gruomatnīku geografiskuos darbeibys vītys īzeimātys stilizātā Latvejis kartis konturā: Pīreiga, Puordaugova (Vilis Altbergs), Latgola[...]